Almaty qalasynyń Medeý aýdanyndaǵy Kókjaılaý shatqalynda (teńiz deńgeıinen 2200 m bıiktikte) serýendep júrgen úsh jasóspirim taýdan túsý kezinde baǵytynan adasyp qaldy. Oqıǵa jaýyn-shashyn kezinde boldy, dep habarlaıdy Egemen.kz.
17 jastaǵy jasóspirimder shuǵyl túrde 112 qyzmetine habarlasyp, kómek suraǵan. Qońyraý boıynsha anyqtalǵan geolokasııa derekteri negizinde Tótenshe jaǵdaılar mınıstrliginiń Respýblıkalyq jedel-qutqarý jasaǵy (RJQJ) izdestirý toby dereý oqıǵa ornyna jiberildi.
Qutqarýshylar jaıaý izdeý jumystaryn shuǵyl túrde bastap, kóp uzamaı jasóspirimderdi tapty. Medısınalyq kómekti qajet etpegenimen, olar taýda biraz ýaqyt adasyp, jańbyrdan keıingi qıyn jaǵdaıda qalǵan.
Kásibı ári jedel áreketterdiń arqasynda jasóspirimder esh zardapsyz qaýipsiz aımaqqa jetkizildi. Bul qutqarý operasııasy TJM mamandarynyń joǵary daıyndyq deńgeıin kórsetti.