IIM-niń kıberqylmysqa qarsy is-qımyl departamenti Ulttyq qaýipsizdik komıtetimen birlesip, qazaqstandyqtardyń jeke málimetterin ınternette zańsyz satqan qylmystyq toptyń jolyn kesti, dep jazady Egemen.kz.
Aqparat memlekettik bazalardan zańsyz alynyp, Telegram arqyly taratylǵan, keıbiri kollektorlyq kompanııalarǵa berilgen. 140-tan astam adam, onyń ishinde kompanııa ıeleri men arna ákimshileri ustalǵan. Qazirgi tańda bes kúdikti qamaýǵa alynǵan. Tintý barysynda 400-den astam kompıýterlik jáne basqa da elektrondyq tehnıka tárkilengen. «Qylmystyq kodekstiń 205-baby 3-bóligi (aqparattyq júıege zańsyz qol jetkizý), 147-baby 5-bóligi (jeke ómirge qol suǵý jáne jeke derekter týraly zańnamany buzý), sondaı-aq 211-baby 3-bóligi (shekteýli elektrondyq aqparattyq resýrstardy zańsyz taratý) boıynsha qylmystyq ister qozǵaldy. Osy zańsyz áreketke qatysy bar adamdardyń tolyq sheńberi anyqtalyp jatyr», dedi IIM kıberqylmysqa qarsy is-qımyl departamentiniń bastyǵy.