Úsh aıǵa sozylatyn kanıkýl kúnderin qyzyqty da mazmundy ótkizý úshin oblystyq bilim basqarmasy on memlekettik mekememen birlese is-sharalar josparyn qurdy. Birneshe baǵytty qamtıtyn demalys josparyna qasıetti oryndar men kórikti jerlerge saıahat, áskerı-patrıottyq tárbıe, eńbek jasaǵy da kiredi. Oǵan óńirdegi 1-10 synyp aralyǵyndaǵy 175 myń oqýshynyń basym bóligi qamtylady dep josparlandy. Bıyl oqýshylardyń demalysyna jergilikti bıýdjetten 228,1 mln teńge bólindi.
Kópshilik ata-ana balalaryna tabıǵat aıasyndaǵy demalys oryndaryn qalaıdy. Bul baǵytta Aqtóbe qalasynyń syrtynda ornalasqan jeti lagerdiń esigi tamyz aıynyń sońyna deıin ashyq turady. Qala syrtyndaǵy lagerlerdegi ortasha joldama quny 80-100 myń teńgege teń. Osy jaǵynan qaladaǵy keı óndiris oryndarynyń bastaýysh kásipodaq uıymdary qyzmetkerleriniń balalaryna joldama satyp alýdy dástúrge aınaldyrǵan.
Bıylǵy jazda «Qazaqstan halqyna» qoǵamdyq qory kvotasymen Aqtóbe oblysynyń 285 oqýshysy elimizdiń kórikti jerlerindegi demalys oryndaryna saıahattaıdy. Olardyń arasynda respýblıkalyq olımpıada jeńimpazdary, kópbalaly otbasylardyń balalary bar. Eńbekke aralasýdy unatatyn jetkinshekter «Jasyl el» jasaǵy men «Sparta» sharýa qojalyǵynyń qarbyz, qulpynaı alqaptarynda jumys istep, qarajat tabýyna múmkindik jasalyndy. Jazǵy eńbek jasaǵyna tartylatyn 716 oqýshynyń basym kópshiligi Oıyl, Qobda aýdanynyń balalary.
Aqtóbe oblysy