Elimiz munaı men gazdyń iri óndirýshisi, alaıda óńdeý áleýeti áli de tómen. Este bolsa 2007 jyly munaı-gaz hımııasy salasyn damytý maqsatynda arnaıy ekonomıkalyq aımaq (AEA) quryldy. Aýmaǵy 3 615 gektar jerdi alyp jatqan AEA-da 3 negizgi alań bar – Qarabatan, Teńiz jáne Tehnopark.
«Qarabatanda kirme avtomobıl joldary, temirjol vokzaly, 310 MVt bý-gaz elektr stansasy, sý daıyndaý men jalpy zaýyttyq ınfraqurylym nysandary salyndy. Búginde aımaqta 18 qatysýshy tirkelgen. Olardyń qatarynda polıpropılen sıntetıkalyq kaýchýk jáne býtadıen, sondaı-aq plastıkalyq buıymdar men geosıntetıkalyq materıaldar óndiretin kásiporyndar shyǵarý jónindegi iri jobalar bar», deıdi Energetıka mınıstri Erlan Aqkenjenov.
Tehnopark alańy munaı hımııasy shıkizaty, onyń ishinde polıetılentereftalat jáne tereftal qyshqyly negizinde ónim shyǵaratyn shaǵyn jáne orta kásiporyndardy ornalastyrýǵa arnalǵan. Teńiz alańy polıetılen jobasyn shıkizatpen qamtamasyz etetin gaz bólý keshenin ornalastyrýǵa baǵdarlanǵan.
2022 jyly qarashada jylyna 500 myń tonna polıpropılen óndiretin KPI zaýyty iske qosyldy. 2024 jyldyń qorytyndysynda zaýyt 250 myń tonna ónim óndirdi. Qazir zaýyt qapshyq, tutynýshylyq oramal, kilem buıymy, bir ret qoldanylatyn ydystar jáne basqa da ónimderdi óndirýge arnalǵan polıpropılenniń 12 markasyn shyǵarady.
Endi jylyna 1,25 mln tonna polıetılen óndiretin zaýyttyń qurylysyn júzege asyrý jumystary jalǵasyp jatyr. Zaýyttyń iske qosylýy 2029 jylǵa josparlanǵan.
«Sondaı-aq Aqtóbe oblysynda karbamıd óndirisi qolǵa alyndy. Ol 2029 jyly iske qosylady. Aqtaýdaǵy ammıak-karbamıd kesheni de sol jyly jumysyn bastaıdy. Alkılat óndirisi – 2027, polıetılentereftalat (PETF) óndirisi – 2029, býtadıen óndirisi 2028 jyly bastalady. Jobalar bazalyq jobalaý qujattamasyn ázirleýden bastap qarjylandyrý tetikterin pysyqtaýǵa deıingi ártúrli satyda tur», dedi mınıstr.