Abaı oblysynyń prokýratýrasy paıdalanylmaǵan jáne zańsyz berilgen jer ýchaskelerin anyqtap, olardy memleket menshigine qaıtarý baǵytynda júıeli jumystar júrgizip jatyr, dep habarlaıdy Egemen.kz.
Júrgizilgen tekserýler nátıjesinde 104 jer ýchaskesiniń uzaq ýaqyt boıy maqsatty túrde paıdalanylmaǵany anyqtalǵan. Jer paıdalanýshylar zań talaptaryn óreskel buzǵan.
«Prokýratýranyń sharalary nátıjesinde jalpy aýdany 42 myń ga jáne kadastrlyq quny 516 mln teńgeni quraıtyn jer ýchaskeleri memleket menshigine qaıtaryldy», delingen habarlamada.
Bul sharalar QR Prezıdentiniń 2024 jylǵy 2 qyrkúıektegi Joldaýynda júktelgen tapsyrmalar aıasynda júzege asyrylyp jatyr. Qazirgi tańda jergilikti atqarýshy organdar bul jerlerdi adal jáne tıimdi paıdalanatyn azamattar men kásipkerlik sýbektilerine berý baǵytynda jumystar atqaryp keledi.
Prokýratýra bul baǵyttaǵy jumystardyń jalǵasatynyn málimdedi.