Aqtaýda Memleket basshysynyń 2023 jylǵy qyrkúıekte bergen tapsyrmasyna sáıkes boı kótergen konteınerlik hab merziminen buryn iske qosyldy, dep habarlaıdy Egemen.kz.
Saltanatty ashylý rásimine Mańǵystaý oblysynyń ákimi, «Samuryq-Qazyna» ulttyq ál-aýqat qory» AQ men «Qazaqstan temir joly» ulttyq kompanııasy» AQ basshylyǵy, halyqaralyq seriktester men jetekshi logıstıkalyq kompanııalardyń ókilderi qatysty. Jobaǵa tikeleı atsalysyp, onyń sátti júzege asýyna úles qosqan azamattarǵa arnaıy marapattar tabystaldy.
«Bul jobanyń sátti júzege asýyna atsalysqan barlyq azamattarǵa alǵys aıtamyn. Qazaqstan úshin tranzıttik-kóliktik áleýetti damytý – strategııalyq mańyzy bar baǵyttardyń biri. Osy jolda «Samuryq-Qazyna» qory men QTJ birlesip, tek elimizde ǵana emes, shetelde de aýqymdy jumystar júrgizip jatyr. Sońǵy on jylda QTJ men Qytaıdyń Lıanıýngan porty arasyndaǵy áriptestik aıasynda Lıanıýnganda Qazaqstan-Qytaı termınaly, Qorǵas qaqpasyndaǵy «Khorgos Gateway» qurǵaq porty ashyldy. Endi mine, Aqtaýda konteınerlik hab iske qosyldy. Bul – elimizdiń kólik-logıstıka salasyndaǵy ilgeri qadamy», dedi «Samuryq-Qazyna» AQ basqarma tóraǵasy Nurlan Jaqypov.
Jańa hab elimizdiń tranzıttik áleýetin edáýir arttyryp, Qazaqstannyń Shyǵys – Batys, sondaı-aq Soltústik – Ońtústik baǵyttary boıynsha halyqaralyq kólik dálizderindegi rólin nyǵaıta túsedi. Zamanaýı logıstıkalyq ınfraqurylym men elimizde teńdesi joq jańa tehnologııalardyń arqasynda konteınerlik júkterdi óńdeý edáýir jyldam júzege asady.
Nysan jumysynyń bastalýyn Qytaıdan kelgen 100 myńynshy konteınerdiń kelýimen atap ótti. Bul júk Transkaspıı halyqaralyq kólik marshrýty (TMTM) boıynsha jetkizilgen.
Aıta keteıik, joba «KTZ Express» aksıonerlik qoǵamy, Qytaıdyń eń iri teńiz aılaqtarynyń biri – Lıanıýngan porty jáne «Aqtaý halyqaralyq teńiz saýda porty» AQ arasyndaǵy seriktestik negizinde júzege asyrylǵan.
Jobanyń bas merdigeri – Qytaıdyń iri memlekettik korporasııalarynyń biri sanalatyn China Communications Construction Company (CCCC) konsorsıýmy. Kompanııa kólik ınfraqurylymyn salýda jáne port qurylysy salasyndaǵy iri jobalardy júzege asyrýda mol tájirıbege ıe. Ozyq tehnıkalyq sheshimderi men tıimdi qurylys basqarý júıesiniń arqasynda hab qysqa merzim ishinde iske qosylyp otyr.