Aqtoǵaı aýdanynyń ortalyǵynan jańa shaǵyn aýdan boı kóterip keledi. Shaǵyn aýdannyń basty sharapaty turǵyn úı kezeginde turǵandardyń sany azaıady.
Jańa shaǵyn aýdanda alǵashqy turǵyndary úılerine qonystanyp úlgeripti. О́tken jyldyń sońyna qaraı 15 eki páterli úı, bir 12 páterli ekiqabatty úı paıdalanýǵa berildi. Úılerdiń bári ortalyq kommýnıkasııalarǵa qosylǵan. Jylý jelisi, sý qubyry, káriz, elektr qýaty bar.
Mundaǵy maqsat – turǵyn úı kezeginde turǵan áleýmettik osal otbasylardy baspanamen qamtamasyz etý, olardyń turmys sapasynyń jaqsarýyna qoldaý kórsetý, páter kezegin azaıtý. Búginde aýdanda turǵyn úı kezeginde turǵan 314 otbasy bar.
«Turǵyn úı máselesin sheshý, turǵyndardy apatty úılerden kóshirý maqsatynda ótken jyly Aqtoǵaı aýylynyń soltústik-shyǵysynda jańa shaǵyn aýdannyń qurylysy bastaldy. Turǵyn úı kezekte turǵandar arasynda bólinedi. Munymen qosa, byltyr Shashýbaı kenti men Aqtoǵaı aýylynda 120 otbasy páterge ıe bolyp, qonystoıyn toılaǵan. Qonys ıeleriniń arasynda jas mamandar da bar», deıdi Aqtoǵaı aýdanynyń ákimi Abylaı Amanjolov.
Ańsaǵan Qabyhan týǵan aýylyna kelip, mektepte sabaq berip júr. Bıyl jańa páterge qol jetkizgen onyń qýanyshynda shek joq.
«Bul kúndi otbasymyzben uzaq kúttik. Ekeýmiz de mektepte jumys isteımiz. О́zim ınformatıka páninen sabaq beremin, jubaıym – baǵdarlamashy. Ázirge eki balamyz bar. Bıyl qańtar aıynda osy jańa úıdegi páterimizge kóshtik. Úı qysta jyly, ómir súrýge óte yńǵaıly. Úkimettiń qamqorlyǵyna, aýdan ákimdigine dán rızamyz», degen qýanyshymen bólisti A.Qabyhan.
«Jańa úıge byltyr 15 jeltoqsanda kirdim. Qysta jyly, jaıly, jaryq. О́zim aýdandyq Mansap ortalyǵynda assıstent bolyp jumys isteımin. Kezekte 3-4 jyldaı turdym. Bir ulym, bir qyzym bar. Úı unady, memlekettik baǵdarlamanyń múmkindigin usynǵan ákimdikke alǵysym sheksiz», deıdi Aqtoǵaı kentiniń turǵyny, jańa páterge qol jetkizgenderdiń biri Ardaq Álibekqyzy.
Bıyl da munda qurylys jalǵasyp jatyr. Taǵy 14 eki páterli úı men 12 páterli ekiqabatty bir úıdi paıdalanýǵa berý josparlanyp otyr. Odan bólek, ınjenerlik jeliler, atap aıtsaq, qazandyq, sý qubyry, káriz, elektr jelileri tartylyp jatyr. Onyń aldynda talapqa saı ekenine kóz jetkizý maqsatynda tekseris júrgiziledi.
Shashýbaı, Saryshaǵan kentterinde de turǵyn úı máselesi ońynan sheshilip keledi. Qazir Shashýbaıda 70 páterge qaıta jóndeý júrgizilip jatyr. Saryshaǵanda 12 páterli ekiqabatty turǵyn úıdi jaqyn merzimde tapsyrý kózdelgen.
«Qazir jumys aıaqtalýǵa jaqyn. Ortalyq jylýǵa bıyl qosylady. Páterlerdi áleýmettik osal top sanatyndaǵy otbasylarǵa usynamyz. Úılerdi jekemenshik kompanııalar salyp jatyr. Jergilikti bılik satyp alyp, baspanaǵa muqtaj otbasylarǵa beredi. Bul – tıimdi tásil. Úıge 3 jylǵa kepildik beriledi. Kemshilik shyqsa, qurylys kompanııasyna eskertý jasalady, olar óz tarapynan tıisti jumys júrgizedi. Bir sharshy metrdiń baǵasy – 230 000 teńge. 12 páterlik ekiqabatty úı jalpy 650 sharshy metr kóleminde. 3 bólmeli páterdiń aýdany – 58 sharshy metr. Iаǵnı quny shamamen 11–12 mln teńge. Jylý, sý, elektr júıesi tolyqtaı ortalyqtandyrylǵan», deıdi aýdan ákiminiń orynbasary Ardager Qapashev.
Aýdandaǵy ózekti máseleniń biri – joldardy jóndeý. Byltyr «Aqtoǵaı-Aqjaryq» jolynyń qurylysy qolǵa alynǵan. Búgingi kúni 20 shaqyrymyna asfalt tóseldi. Bıyl taǵy 15 shaqyrym jol jańartylady. Odan bólek, maýsym aıynda «Aýyl – el besigi» arnaıy jobasy aıasynda tanymal týrıstik oryn Bektaý ata shatqalyna kireberis joldy jóndeý bastalady. Shashýbaı, Saryshaǵan, basqa da eldi mekenderde ortalyq kóshelerdi abattandyrý júrgizilip, kentishilik joldar jóndelip jatyr.
Qaraǵandy oblysy,
Aqtoǵaı aýdany