Ońtústik Koreıanyń Chechhon qalasyndaǵy «Jecheon Gymnasium» arenasynda sporttyq gımnastıkadan erler men jastar arasyndaǵy Azııa chempıonaty aıaqtaldy.
Chechhonda elimizdiń quramasy alǵashqy medaldy komandalyq kópsaıysta jeńip aldy. Komanda quramynda Narıman Kurbanov, Mılad Karımı, Dmıtrıı Patanın, Roman Mamenov, Ilııas Ázizov, Álisher Toıbazarov óner kórsetti. Olar 240.301 upaı jınap, úshinshi satyǵa taban tiredi. Alǵashqy eki oryndy Japonııa (253.002 upaı) men Qytaı (248.265) ıelendi. Odan keıin Mılad Karımı (14.400) erkin jattyǵýda kúmispen kúpteldi. Otandasymyz Fılıppınniń maqtanyshy, Parıj Olımpıadasy men álem chempıonatynyń eki dúrkin jeńimpazy, Azııa birinshiliginde 17 ret (11 altyn+2 kúmis+4 qola) jeńis tuǵyryna kóterilgen Karlos Iýlodan (14.600) ǵana qalyp qoıdy. Qola medaldy Ońtústik Koreıanyń oǵylany Mýn Gyn Ion (14.033) enshiledi.
Jarys naǵyz qyzǵan shaqta Narıman Qurbanov (14.933 upaı) barsha qazaq jankúıerin qýantty. Byltyr Parıjde alaýy tutanǵan Olımpııa oıyndarynda kúmis medaldy moınynda jarqyratqan jerlesimiz «at» jattyǵýynda aldyna jan salmaı, bas júldeni qanjyǵasyna baılady. Ekinshi, úshinshi oryndarda – Výn Hýr (Ońtústik Koreıa) men Dan Ngok Then (Vetnam) – 14.233. Sóıtip, jerlesterimiz bıylǵy jylǵy qurlyq chempıonatyn 3(1 altyn+ 1kúmis+1 qola) júldemen qorytyndylap, jalpy esepte úzdik úshtikti túıindedi. Aldymyzda – Japonııa (3+3+0) men Qytaı (1+3+1).
Elimizdiń jastar quramasy da jalpy esepte úshinshi oryn aldy. Bizdiń jigitter 2 altyn, 1 kúmis, 1 qolany oljalady. Atap aıtsaq, Nurtan Ydyrysov pen Roman Hegaı óz jattyǵýlarynda teńdessiz dep tanylsa, Nurtan taǵy bir saıysta kúmiske qol jetkizdi. Qola medaldy jas órenderimiz komandalyq kópsaıysta ıelendi.