Elimizde alǵash ret otandyq oqýshylar halyqaralyq «International STEM Olympiad» olımpıadasynyń grand-fınalyna joldama aldy.
– Bul – jas daryndardyń ǵylym men tehnologııa salasyndaǵy áleýetin álemge tanytatyn úlken jetistik. Osy joly biz resmı túrde shaqyrtý aldyq. Buryn jeke qatysýshylar bolǵan. Alaıda top bolyp barǵan emespiz. Qazaqstan atynan komanda retinde birinshi ret qatysý – eldiń atyn shyǵaratyn tarıhı sát, – deıdi atalǵan olımpıadanyń uıymdastyrýshysy Zalqarbek Muratálıuly.
STEM – bul tehnologııa, ınjenerııa, matematıka ǵylymy baǵytyn qamtyǵan bilim júıesi. Munda ınjenerlik robottehnıka jáne 3D modeldeý, baǵdarlamalaý sııaqty tehnıkalyq salalar da qarastyrylǵan.
Olımpıada fınalısteriniń biri – Astana qalasyndaǵy №84 mektep-lıseıiniń oqýshysy Aısha Temirhan. Ol olımpıadaǵa matematıka baǵytynan baq synaıdy. Onyń aıtýynsha, bul joldaǵy alǵashqy qadamy kezdeısoq bastalǵan. «Onynshy synypta bizge jańa muǵalim kelip, osy olımpıada týraly aıtty. Birneshe kún ishinde robot qurastyryp, qalalyq kezeńge qatystyq. Sol jerden halyqaralyq deńgeıge óttik. Biraq ótken jyly oń nátıje bolmaǵan soń, bıyl ózimizdi qaıta synap kórdik», deıdi ol.
Bul jobanyń jartylaı fınalyna Qazaqstanmen birge Reseı, Qyrǵyzstan jáne Tájikstannan kelgen 260-tan astam oqýshy, 78 komanda baq synady. Al elimizden 24 oqýshy qatysty. Solardyń ishinen oza shapqan bizdiń segiz jetkinshek Ispanııanyń Barselona qalasynda 9–15 shilde aralyǵynda ótetin grand-fınalda el namysyn qorǵaıdy.
Farıza IZBASAROVA,
L.N.Gýmılev atyndaǵy EUÝ-dyń 3-kýrs stýdenti