Q.I.Sátbaev atyndaǵy Qazaq ulttyq tehnıkalyq zertteý ýnıversıtetiniń ustaz-stýdentterinen quralǵan ǵylymı-shyǵarmashylyq top modýldik úı qurastyrdy. Tótenshe jaǵdaı týyndaǵanda, týrıstik aımaqtar men vahtalyq kentterde, halyq tyǵyz ornalasqan óńirlerdegi baspana máselesin sheshýge arnalǵan joba avtorlar atyna patenttelip úlgergen, dep jazady Egemen.kz.
Modýldik qurastyrý jahandyq qurylys salasynda belsendi engizilgen. Qytaıdyń Shenchjen qalasyndaǵy Tencent keńse ortalyǵy, CitizenM Tower of London qonaq úıi, Kanadanyń Monreal qalasyndaǵy Habitat 67 turǵyn úı kesheni - modýldik ǵımarattardyń jarqyn mysaly. Osyndaı negizge qurylǵan ýnıversıtettiń ınjenerlik toby jobalaǵan nysandar temirbeton modýlmen salystyrǵanda 10 ese jeńil, jumys kúshin 5 ese az qajet etedi. Seısmıkalyq qaýipsiz joba kánigi qurylystan 2 ese qaltaǵa qonymdy. Joba jetekshisi, Qazaqstannyń qurmetti qurylysshysy Erik Turashulynyń aıtýynsha, modýldik úıdi kez kelgen orynǵa ońaı ornalastyrýǵa bolady.
«Tehnıkalyq sıpattamasy talapqa saı modýldik úılerdiń pishinine de tańdaý kóp. Suranysqa qaraı qoǵamdyq ǵımarattardy, saýda nysandaryn, týrıster turaqtaıtyn oryndardy sheńber, doǵa, úshburysh formada da qurastyrý oılastyrylǵan. Jobalaý kezeńinen shákirttermen birge iske asyrylǵan modýldik úıdi ýnıversıtet aýlasynda qurastyrdyq. Qazir jańa júıemen salynǵan nysan stýdentterdiń sergip, demalatyn, shyǵarmashylyqpen aınalysatyn alańyna aınalǵan», dep sózin sabaqtaǵan Sátbaev ýnıversıtetiniń professory joba ásirese, týrızm salasyn túletýge serpin beretinin atap ótti. «Qazaqstan tabıǵaty – kóp qyrly. Taý, shatqal, jer bederinen birneshe shaqyrym tómen oranalasqan kórikti mekender kóp. Sondaı oryndarǵa týrısterdi tartý úshin jaıly oryn bolýy mańyzdy. Bizdiń joba osy túıindi az shyǵynmen tarqata alady. Arnaıy sehta daıyndalǵan temir qańqalardy tehnıkamen jetkizý de jeńil ári qurastyrýǵa aı jetkilikti. Maýsymdyq saıahat kezinde bos qalsa sý tasqyny, ózge de tótenshe jaǵdaıda qabyldaý pýnktteriniń qyzmetin atqara alady. Sebebi jobada ınfraqurylymdyq, ómir súrýge qajetti bólikter eskerilgen», dedi Erik Turashuly.
Eki jetekshi, 11 stýdenttiń modýldik úı jobasyn Qazaq bas sáýlet-qurylys akademııasynyń mamandary da joǵary baǵalaǵan. Izdenýshiler bastamasy Qyrǵyzstan Respýblıkasyndaǵy ǵylymı baıqaýda da júlde enshilegen. Jobanyń ózge de utymdy tusyn bolashaq ınjener Madııar Shrazdın tarqatty.
«Joba ıdeıasy 2024 jyldyń qańtarynda oıǵa qondy. Ustazdarymyz Erik Turashuly men Qazaqstannyń qurmetti arhıtektory Serik Syzdyquly oıymyzdy qýattap, iske asyrý barysynda mol tájirıbesimen bólisip, qate-kemshilikterimizdi kúzep-túzedi. Osyndaı orasan qoldaý aıasynda ekologııalyq taza, mobıldi jobamyzdy sózden iske deıin jetkize aldyq. Modýldi úıdiń bir qabatpen shektelmeıtinine de nazar aýdarǵym keledi. Jobalaý barysynda materıaldy ózara almastyrý, qajettilik týǵanda daıyn úıdiń qaptalynan, joǵarydan blok qosý múmkindikteri qarastyrylǵan», dedi Q.I.Sátbaev ýnıversıtetiniń 3-kýrs stýdenti.
Injenerlik top joba ıgiligin, masshtabyn keńeıtip shetelge shyǵarýdy kózdep otyr. Ǵalamdyq suranys tamyryn basyp otyrǵan stýdentter modýldik úı jobasy halqy tyǵyz ornalasqan Afrıka elderindegi de baspanaǵa qajettilikti bıýdjet turǵysynan tıimdi sheshýge bolatynyn tilge tıek etti.