Qyzylorda oblysynyń Jańaqorǵan aýdanynda 6,5 myń kásipker bar. Bul qaǵaz júzindegi kórsetkish emes, is bastaǵandardyń 96%-y turaqty jumys isteıdi. Aýdandyq kásipkerlik jáne ónerkásip bóliminiń basshysy Marlen Nurtazaevtyń dereginshe, byltyr «Aýyl amanaty» baǵdarlamasy aıasynda 165 mln teńgege 29 joba bastalǵan.
Odan bólek, óńirdegi temir-beton, asfalt óndirisi sekildi iri jobalar bıyl iske qosylady. Bir gektar aýmaqqa jylyjaı salatyn ınvestor daıyn. Aldaǵy 2-3 jylda 10 joba iske aspaq. «Buryn kásipkerlikte qyzmet kórsetýmen aınalysatyndar kóp bolatyn. Qazirgi jobalar arasynda óndiristik baǵyt basym. Ispen aınalysam degender arasynda jastar kóp», deıdi bólim basshysy.
Memleket qoldaýymen sharýasy alǵa basqan turǵynnyń biri – Naýryz Aıymbetov. Bastapqyda 2 sotyq jerge jylyjaı salǵan ol búginde aýqymyn ulǵaıtyp, tabysyn eseleı túsken.
«Otbasylyq bıznesti ákem bastady. Bastapqyda jylyjaıy shaǵyn edi. Tabysty bolaryna kóz jetkizgesin kólemdi kóbeıtýdi oıladyq. Osylaısha, «Aýyl amanaty» jobasy aıasynda nesıe alyp, 8 sotyq jerge qyzanaq, qııar egip otyrmyz. Jylyna qyzanaqtan – 10, qııardan 5-6 tonna alamyz. Taza paıdamyz 5-6 mln teńgeniń aınalasynda», deıdi kásipker.
О́tken qysta tájirıbe retinde salat japyraǵyn egip kórgen. Babyn tapsań, bite qalatyn kókónis eken. Qystyń sýyǵyna da tózimdi bolyp shyqty. Shyqqan ónim aýdandaǵy azyq-túlik dúkenderi men meıramhanalardan artylmady. Byltyr aýdan ákimimen kezdesýde taǵy 1 gektar jer suraǵan. Sol sharýa sózbuıdaǵa salynbaı jyldam sheshilipti. Endi Naýryz Almatydaǵy inisin shaqyryp, keler jyly sol jerden jylyjaı salmaq.
«2000 jyldary О́zbekstannan kóship kelgende osy jer qý taqyr edi. Balalarymdy janyma ertip júrip alma, órik, júzim ektik. Beınettiń arqasynda qazir aýla qalyń baýǵa aınaldy. Osyndaǵy tanystardan alǵan anar kóshetin byltyr tigip, qys boıy jan-jaǵyn qymtap, baptap shyqtym. Qazir alǵashqy jemisin sala bastady. Qýanatynym, balalarymnyń beınetke shydaǵannyń berekege keneletinine kózi jetti. Osynyń arqasynda memlekettiń qoldaýyna súıenip, kásibin keńeıtip otyr», deıdi Naýryzdyń ákesi Jumabaı Aıymbetov.
Jergilikti kásipkerler arasynda makaron ónimderin shyǵaryp jatqandar da bar. Isin naýbaıhana ashýdan bastaǵan Erkinbaı Shiderbaev azyq-túlik dúkenin qatar alyp júrdi. Jańa is bastaý úshin joba quryp, josparyn jetildirgen soń byltyr memlekettik baǵdarlamaǵa qatysyp, «Qyzylorda» О́ńirlik ınvestısııalyq ortalyǵy arqyly 19,5 mln teńgeni 4%-ben aldy. Nesıege qajetti qural-jabdyǵyn túgendedi. Isti bastamas buryn Almaty qalasynan arnaıy tehnolog maman shaqyrtyp, ónim quramyn, jasalý jolyn úırenip, tájirıbe jınaqtady.
«Italııalyq avtomattandyrylǵan tehnologııa arqyly jyl basynan beri 5 tonnaǵa jýyq ónim shyǵaryppyz. Sonyń bári osy aýdanǵa satyldy. Syrttan keletin taýarlardan ereksheligimiz – eshqandaı boıaý qospaımyz. Sapasyna kepildik beremiz. El saýda sóresinen aldymen bizdiń ónimdi izdeıdi», deıdi.
Qyzylorda oblysy,
Jańaqorǵan aýdany