«Qazaqstannyń ekologııalyq uıymdarynyń qaýymdastyǵy» zańdy tulǵalar birlestigi BUU Azyq-túlik jáne aýyl sharýashylyq uıymynyń (FAO) qoldaýymen «Aýyl sharýashylyǵy, orman sharýashylyǵy jáne basqa jer paıdalanýlary salasyndaǵy kómirtegi jobalary» taqyrybynda trenıng ótkizdi, dep habarlaıdy Egemen.kz.
Is-shara GCP/KAZ/005/GFF «Qazaqstandaǵy klımattyq turaqtylyqty qamtamasyz etý men jaıylymdyq jerlerdi qalpyna keltirý úshin agroormanmelıorasııa» jobasy aıasynda uıymdastyryldy.
Elimiz álemdik ortasha kórsetkishpen salystyrǵanda klımattyń ózgerýine qatty ushyrap otyr – temperatýra onjyldyqta 0,32°S joǵarylaıdy. Bul jaıylymdardyń tozýyna, qurǵaqshylyqqa, aýyl men mal sharýashylyǵy ónimdiliginiń tómendeýine alyp keledi. AFOLU salasynda klımatqa tózimdi tájirıbelerge kóshý, táýekelderge beıimdelý men ekojúıelerdiń kómirtegin sińirý qabiletin qalpyna keltirýge kómektesedi.
Zertteýlerge qaraǵanda, 2060 jylǵa qaraı mal sharýashylyǵy elimizdegi parnıktik gaz shyǵaryndylarynyń eń úlken kózine aınalmaq. Al orman sharýashylyǵy men jer paıdalaný negizgi kómirtegi sińirgishter bolýy múmkin. Bizdiń elde kómirtegi jobalary úshin úlken áleýet bar – 200 mln ga aýylsharýashylyq jerleri men jaıylymdar boıynsha álemde 4-shi orynda. Degenmen, onyń kólemin ulǵaıtýǵa monıtorıng júıesin (MRV), normatıvtik bazany jetildirý men fermerlerdiń habardarlyǵyn arttyrý qajet. Kómirtegi aýyl sharýashylyǵyn damytý – ınvestısııa tartý men turaqty damýǵa strategııalyq múmkindik.
Is-sharanyń maqsaty – memlekettik organdar men mamandardyń turaqty jer paıdalaný, agroormanmelıorasııa men kómirtegi naryǵy salasyndaǵy áleýetin arttyrý, sondaı-aq Qazaqstanda kómirtegi aýyl sharýashylyǵyn ulǵaıtýǵa normatıvtik jáne ınstıtýsıonaldyq bazany qalyptastyrýǵa praktıkalyq qadamdardy talqylaý.
Trenıngte halyqaralyq standarttar men erikti kómirtegi naryǵynyń (VCM) mehanızmi, jaıylymdardy qalpyna keltirý, agroorman sharýashylyǵy, topyraqtaǵy kómirtegin sińirý sııaqty kómirtegi aýyl sharýashylyǵy tájirıbesi, Qazaqstandaǵy kómirtegi jobalaryn iske asyrý mysaldary, sheteldik ınvestısııalardy tartýǵa kedergi bolatyn quqyqtyq tosqaýyldar men olqylyqtar, sondaı-aq kómirtegi jobalaryn monıtorıngteý, esep berý men verıfıkasııalaý (MRV) ulttyq júıesin ázirleý jónindegi usynystar talqylandy.
«Qazaqstannyń ekologııalyq uıymdarynyń qaýymdastyǵy» zańdy tulǵalar birlestigi BUU-nyń Azyq-túlik jáne aýyl sharýashylyq uıymymen kelisimshart negizinde «Agroormanmelıorasııa arqyly klımattyq turaqtylyqty qamtamasyz etý jáne Qazaqstandaǵy jaıylymdyq jerlerdi qalpyna keltirý» jobasynyń jedel seriktesi mártebesin aldy.
Joba jerdiń ónimdiligin qalpyna keltirýge baǵyttalǵan. Ol turaqty basqarý ádisterin engizý men Qazaqstannyń maqsatty búlingen landshafttaryndaǵy aǵymdaǵy úrdisterdi turaqtandyrý arqyly aýyldyq qaýymdastyqtardyń áleýetin arttyrýǵa jáne jer resýrstaryn turaqty basqarý ádisterin ilgeriletýge múmkindik beredi.
Is-sharaǵa memlekettik vedomstvo ókilderi, halyqaralyq uıymdar men ǵylymı qaýymdastyqtar, sondaı-aq bıznes qurylymdar men óńirlerden kelgen sarapshylar qatysty.