Semeıde Abaı Qunanbaıulynyń 180 jyldyq mereıtoıy aıasynda Álıhan Bókeıhan Ýnıversıtetiniń bastamasymen «Abaı eline saıahat» jobasy qolǵa alyndy. Bul týraly Ǵylym jáne joǵarǵy bilim mınıstrligi habarlady, dep jazady Egemen.kz.
«Abaı eline saıahat» – joǵary oqý oryndarynyń bilim alýshylary úshin arnaıy ázirlengen, tarıhı jáne mádenı muralardy, qazaq halqynyń uly tulǵalarynyń izi qalǵan ǵımarattar men eldi mekenderdi aralaýǵa múmkindik beretin tanymdyq-týrıstik joba.
2 maýsymda bastalǵan joba tamyz aıynyń sońyna deıin jalǵasady. Osy ýaqyt aralyǵynda elimizdiń ár óńirindegi joǵary oqý oryndarynyń stýdentteri birneshe kún boıy, arnaıy ekspedısııalyq top quramynda Semeı óńirindegi tarıhı jerler men mýzeılerdi, onyń ishindegi Jıdebaıdaǵy Abaı mýzeı-úıi men «Abaı men Shákárim» memorıaldyq kesenesin aralaıdy.
Tanymdyq ekskýrsııalardan bólek bilim alýshylar úshin birlesken kıno kórsetilimder, pikir almasý keshteri, qyzyqty oıyndar men tımbıldıng sessııalary uıymdastyrylady.
Jobaǵa qatysýǵa alǵashqylardyń biri bolyp Almaty qalasyndaǵy Halyqaralyq aqparattyq tehnologııalar ýnıversıtetiniń stýdentteri barǵan. Bilim alýshylar Álıhan Bókeıhan ýnıversıtetindegi jastarmen birge Semeıdiń tarıhı oryndary men kórikti jerlerin aralap, Jıdebaıdaǵy Abaı mýzeı-úıi men «Abaı men Shákárim» memorıaldy keshenine sapar shekken.
Ýnıversıtettiń Stýdentter úıine ornalasqan bilim alýshylar úshin mádenı-saýyqtyq baǵdarlama men álemge áıgili qaraǵaıly orman aýmaǵynda ótken arnaıy tımbıldıng sharasy uıymdastyrylǵan. Sapar aıasynda HATÝ stýdentteri Semeı jurtshylyǵy men qala qonaqtaryna arnaıy daıyndap ákelgen «Abaı eline tartý» atty konserttik baǵdarlamasyn usyndy.