QR Premer-mınıstri Oljas Bektenov Roca Group dırektorlar keńesiniń tóraǵasy Santıago de Gomar Rokamen kezdesý ótkizdi. Kelissóz barysynda Qyzylorda oblysynda sanıtarlyq-tehnıkalyq ónimder shyǵaratyn joǵary tehnologııalyq zaýyt salý jobasy jáne ınvestısııalyq yntymaqtastyqty tereńdetý máseleleri qaraldy, dep habarlaıdy Egemen.kz.
Josparlanǵan zaýyt jylyna 500 myń danaǵa deıin santehnıkalyq buıym óndirýge qaýqarly bolady. О́ndiris nysany Qyzylorda oblysyndaǵy «О́ndiris» ındýstrııalyq aımaǵynda ornalasady, qazirgi tańda qajetti jer telimi belgilengen. Kásiporyn ishki naryqpen qatar, ónimin Ortalyq Azııa elderine eksporttaýǵa baǵyttalady. Jalpy ınvestısııa kólemi 70 mıllıon eýroǵa baǵalanyp otyr. Joba iske qosylǵan jaǵdaıda shamamen 300 jańa jumys orny ashylady dep kútiledi.
Kezdesý barysynda Santıago de Gomar Roka Qazaqstandy Roca Group úshin Ortalyq Azııadaǵy strategııalyq damý alańy retinde qarastyratynyn málimdedi. Onyń aıtýynsha, Qazaqstan qolaıly ınvestısııalyq ahýal men logıstıkalyq múmkindikter usynady.
«Qazaqstan – Ortalyq Azııadaǵy qatysýymyzdy keńeıtý úshin qısyndy tańdaý. Biz eldi búkil aımaq úshin tıimdi jumys isteı alatyn ónerkásiptik jáne logıstıkalyq hab retinde qarastyramyz. Qyzylordadaǵy joba jergilikti ekonomıkanyń damýyna úles qosyp, halyqaralyq strategııamyzdyń mańyzdy bóligine aınalatynyna senimdimiz», dedi ol.
О́z kezeginde, Premer-mınıstr Oljas Bektenov ónerkásiptik óndiristi lokalızasııalaý Úkimettiń basym baǵyttarynyń biri ekenin atap ótti. Ol Memleket basshysy Qasym-Jomart Toqaevtyń bastamasymen otandyq óndiristi qoldaý men ımportqa táýeldilikti azaıtýǵa baǵyttalǵan saıasat belsendi júzege asyrylyp jatqanyn jetkizdi.
«Qazaqstan Prezıdenti Qasym-Jomart Toqaevtyń ekonomıkalyq turaqtylyqty qamtamasyz etýdegi basym baǵyty aıasynda otandyq óndiristi qoldaýǵa jáne syrtqy jetkizilimderge táýeldilikti azaıtýǵa baǵyttalǵan ımportty almastyrý saıasaty belsendi damyp keledi. Qazaqstan men Ispanııa – strategııalyq seriktester. Sondyqtan biz kompanııany senimdi seriktes retinde kóremiz jáne tereń ındýstrııalyq damý úshin joǵary tehnologııalyq óndiris tartýdy quptaımyz. Úkimet jobanyń sátti júzege asýy úshin qajetti kómek kórsetedi», dedi Premer-mınıstr.
Kezdesý qorytyndysy boıynsha QR О́nerkásip jáne qurylys mınıstrligi, Qyzylorda oblysynyń ákimdigi jáne Roca Group arasynda ınvestısııalyq jobany júzege asyrý qaǵıdattary týraly negizdemelik kelisimge qol qoıyldy.