Aýyl sharýashylyǵy mınıstri Aıdarbek Saparov Astanaǵa resmı saparmen kelgen Iran Islam Respýblıkasynyń Aýyl sharýashylyǵy jıhady mınıstri Golamreza Nýrı Gezeldje myrzamen kezdesý ótkizdi. Kezdesý barysynda taraptar dándi-daqyldar eksporty men agrarlyq áriptestikti keńeıtý máselelerin talqylady, dep habarlaıdy Egemen.kz.
Mınıstrdiń málimetinshe, 2024 jylǵy qyrkúıekten beri Qazaqstan Iranǵa 960 myń tonna astyq eksporttaǵan. Bul ótken jyldyń sáıkes kezeńimen salystyrǵanda 17 ese kóp. Aldaǵy ýaqytta bıdaı eksporty jylyna 2 mln tonnaǵa, arpa eksporty 1 mln tonnaǵa deıin ulǵaıtylady.
Sonymen qatar, Qazaqstan Iranǵa jyl saıyn 500 myń tonnaǵa deıin kúnbaǵys maıy men kúnjara jetkizýge daıyn. Aýyl sharýashylyǵy ónimderin tereń óńdeý salasynda ınvestısııalyq seriktestikti damytý – eki el úshin strategııalyq baǵyttardyń biri.
«Biz Iranǵa dándi jáne maıly daqyldardy eksporttaýda joǵary áleýetti kórip otyrmyz. Taraptar saýda kólemin aıtarlyqtaı ulǵaıtýǵa múddeli», dedi mınıstr Aıdarbek Saparov.
2024 jyldyń qorytyndysy boıynsha Qazaqstan men Iran arasyndaǵy agrarlyq saladaǵy saýda kólemi 220,1 mln AQSh dollaryn quraǵan. Bul 2023 jylmen salystyrǵanda 33,2%-ǵa artqan. Al 2025 jyldyń alǵashqy tórt aıynda bul kórsetkish 139%-ǵa ósip, 151,1 mln dollarǵa jetken. Onyń ishinde qazaqstandyq eksport úsh esege artyp, 116,7 mln dollardy quraǵan.
Negizgi eksporttyq taýarlar qataryna arpa, maıly daqyldar, ósimdik maıy, júgeri, burshaq tuqymdastar jáne et ónimderi kiredi.
Iran tarapy Qazaqstanmen uzaqmerzimdi kelisimsharttarǵa daıyn ekenin málimdedi. Sondaı-aq, sýarý júıeleri, veterınarııa, asyl tuqymdy mal genetıkasy boıynsha tehnologııa almasýǵa nıetti ekendigin bildirdi.
Kezdesý nátıjesinde eki mańyzdy qujatqa qol qoıyldy:
1.Qazaqstannyń Astyq odaǵy men Irannyń Azyq-túlik ónerkásibi qaýymdastyǵy dándi daqyldar men mal azyǵy saýdasyn damytý, ırandyq port ınfraqurylymyn logıstıkada qoldaný týraly ýaǵdalasty.
2.«Temirtaý Treıd» JShS men ırandyq seriktester aýyl sharýashylyǵy ónimderin jetkizýge qatysty kelisimge keldi.
«Búgingi kezdesý Qazaqstan men Iran arasyndaǵy seriktestikti jańa deńgeıge kóteretinine senimdimin. Aýyl sharýashylyǵy salasy — eki el arasyndaǵy saýdany 3 mlrd dollarǵa deıin ulǵaıtýda mańyzdy ról atqarady», dep qorytyndylady mınıstr.
Ekijaqty jumys toby aıasyndaǵy yntymaqtastyq jalǵasatyn bolady. Onyń alǵashqy otyrysy 2024 jylǵy aqpanda Tegeranda ótken edi.