Qazaqstanda kópirlerdi basqarýdyń biryńǵaı júıesine pılotsyz ushý apparattary, sıfrlyq kóshirmeler jáne jedel monıtorıng ádisteri engizilýde. Sıfrlandyrý ınfraqurylymnyń qaýipsizdigin arttyryp, ony kútip-ustaýǵa ketetin shyǵyndardy azaıtýǵa múmkindik beredi, dep habarlaıdy Egemen.kz.
Elimizde kólik ınfraqurylymyn basqarý isine sıfrlyq tehnologııalar belsendi túrde engizilýde. Bul baǵytta Qazaq jol ǵylymı-zertteý ınstıtýty (QazjolǴZI) kópirlerdiń tehnıkalyq jaı-kúıin dıagnostıkalaý, baqylaý jáne boljaý boıynsha málimetterdi qamtıtyn biryńǵaı sıfrlyq platformany – Kópirlerdi paıdalaný jáne basqarý júıesin iske qosqan. 2023 jyldan bastap joba aıasynda Pavlodar, Oral jáne Astana aınalma joldary syndy kúrdeli qurylymdardy qosa alǵanda, 100-den astam kópir tekserildi. Búginde olardyń úshólshemdi sıfrlyq kóshirmeleri ázirlenip, qurylymdardyń jaı-kúıin qashyqtan baqylaýǵa jáne táýekelderge jedel den qoıýǵa múmkindik berip otyr. Aǵymdaǵy jyly taǵy 60 kópir tekserilip, sıfrlyq kóshirmesi jasalady.
«Júıe reaktıvti qyzmet kórsetýden proaktıvti basqarýǵa kóshýge jol ashady. El aýmaǵynda biryńǵaı sıfrlyq baza qurylyp, tekserý nátıjeleri biriktirilýde. Sonymen qatar engizilip jatqan baqylaýdyń avtomattandyrylǵan ádisteri kópirlerdiń qaýipsizdigi men kútimine degen kózqarasty túbegeıli ózgertedi», deıdi «QazjolǴZI» kópir jáne jol qurylystary basqarmasynyń basshysy Shalqar Qaısar.
Joba aıasynda: qoljetimsiz jáne iri kólemdi nysandardy qosa alǵanda, kópirlerdi vızýaldy tekserý úshin pılotsyz ushý apparattaryn qoldaný; tehnıkalyq jaı-kúıdi baqylaý men taldaý úshin úshólshemdi sıfrlyq modelderdi ázirleý; paıdalaný jaı-kúıin baǵalaý ádistemeleri men monıtorıng júıelerin qurý qaǵıdattaryn qamtıtyn normatıvtik-tehnıkalyq qujattardy daıyndaý sııaqty negizgi sharalar atqarylyp jatyr. Bıyldan bastap qozǵalysty toqtatpaı-aq jedel dıagnostıka júrgizetin mobıldi ekspress-monıtorıng júıesi engizilmek. Bul jumystardyń barysy Kólik mınıstrliginiń Avtomobıl joldary komıtetiniń baqylaýynda. Aldaǵy ýaqytta júıe respýblıkalyq mańyzy bar barlyq kópirlerdi qamtyp, ınfraqurylymdy ashyq, naqty ári tıimdi basqarýǵa yqpal etýi tıis.
Qazirgi kúni respýblıkamyzda 3500-den astam kópir paıdalanylady. Olardyń edáýir bóligi óńirlik jáne jergilikti joldarda ornalasqan. Kópshiliginiń paıdalaný merzimi shegine jetkenin jáne turaqty tekserý men tehnıkalyq baqylaýdy qajet etetinin eskerý kerek.