Joǵarǵy Sotta «Ekonomıkalyq qyzmet salasyndaǵy qylmystyq quqyq buzýshylyqtar týraly isterdi qaraýdaǵy sot praktıkasynyń problemalyq máseleleri» taqyrybynda dóńgelek ústel basyndaǵy jıyn ótti. Is-sharaǵa Joǵarǵy Sottyń sýdıalary, Respýblıkalyq advokattar alqasy, Bas prokýratýra, Ishki ister jáne Ádilet mınıstrlikteri, Qarjy monıtorıngi agenttigi, Sot saraptamasy ortalyǵy, «Atameken» Ulttyq kásipkerler palatasy, Sot ákimshiligi jáne basqa da múddeli uıym ókilderi qatysty, dep habarlaıdy Egemen.kz.
Forýmdy Joǵarǵy Sottyń qylmystyq ister jónindegi sot alqasynyń tóraǵasy Nazgúl Rahmetýllına ashyp, bıznesti júrgizýge qolaıly orta qalyptastyrý jáne kásipkerlerdi negizsiz qylmystyq qýdalaýdan qorǵaý maqsatynda memleket tarapynan qabyldanyp jatqan júıeli sharalardy atap ótti. Ol Memleket basshysynyń tapsyrmasy aıasynda quqyq qorǵaý salasyndaǵy shekten shyǵýshylyqtardy joıý men naqty quqyqtyq ustanymdardy qalyptastyrýdyń mańyzyn jetkizdi.
Respýblıkalyq advokattar alqasynyń tóraǵasy Aıdyn Bikebaev kassasııalyq satynyń engizilýin, sot tóreligi sapasyn arttyrýdy, tergeý sottarynyń jumysyn jaqsartýdy jáne elektrondy bilezikterdi keńinen qoldaný bastamalaryn oń baǵalady. Sondaı-aq advokattardyń mártebesin kóterý men olardyń kásibı qyzmetine kedergi keltirmeý máseleleri qozǵaldy.
Joǵarǵy Sottyń sýdıasy Asqarjan Kenjeǵarın salyq tóleýden jaltarýǵa qatysty qylmystarda bastapqy esep qujattarynyń, onyń ishinde tólengen salyq somalaryn anyqtaýdaǵy mańyzyn atap ótti. Ol tergeý organdarynyń osy qujattarǵa erekshe nazar aýdarý qajettigin eske saldy.
Ishki ister mınıstriniń orynbasary Sanjar Ádilov elde urlyqtyń 53 paıyzǵa azaıǵanyn aıtty. Sonymen qatar alaıaqtyq, kıberqylmys, nesıe jáne bank salasyndaǵy qylmystar sany artqanyn habarlap, olardy tirkeý tártibin naqtylaý qajettigin atap ótti. Mundaı ister azamattyq-quqyqtyq qatynastar retinde jıi qarastyrylmaıtynyn da jetkizdi.
Qarjy monıtorıngi agenttigi tóraǵasynyń orynbasary Jeńis Elemesov qarjy pıramıdalaryna qatysty jáne qylmystyq jolmen tabylǵan múlikti zańdastyrý boıynsha naqty normatıvtik qaýlylar qabyldaý qajettigine toqtaldy.
RAA tóraǵasynyń orynbasary Igor Vranchev tergeý sýdıalarynyń quzyreti men saraptamalardyń keıbir sáıkessizdikteri týraly másele kóterdi.
Forým barysynda Bas prokýratýranyń basqarma bastyǵy Dýlat Áýbákirov, «Atameken» Ulttyq kásipkerler palatasy tóraǵasynyń orynbasary, QR Kásipkerler quqyǵyn qorǵaý jónindegi ýákili Qanat Nurov ta sóz sóılep, óz usynystaryn bildirdi.
Qatysýshylar arasynda syndarly pikirtalas ótip, aıtylǵan usynystar Joǵarǵy Sottyń aldaǵy normatıvtik qaýly jobasynda eskeriletin boldy.