Túrkistan oblysy prokýratýrasynyń tarapynan bıyl «Invest-Karavan 2025» is-sharasy sheńberinde 3 kóshpeli kezdesý ótkizilip, 26 ınvestormen tikeleı suhbat júrgizilgen. Sondaı-aq 6 ınvestorǵa qatysty zańsyz sheshimder qabyldanǵany anyqtalyp, olarǵa qatysty tirkelgen ákimshilik isterdiń kúshi joıyldy. Al 4 ınvestorǵa qatysty ýákiletti organdardyń negizsiz tekserýleri toqtatyldy. Nátıjesinde bıyldyń 5 aıynda 216 jeke kásipkerdiń jáne 6 ınvestordyń quqy qorǵalyp, jalpy somasy 79,7 mlrd teńge bolatyn 7 ınvestısııalyq joba boıynsha keıster sheshildi, dep habarlaıdy Egemen.kz.
Bul derekter oblys prokýratýrasy men kásipkerler palatasynyń uıymdastyrýymen ótken «Bıznes jáne ınvestısııany qorǵaý» forýmynda keltirildi. Kásipkerlerdiń quqyn qorǵaý, óńirdegi bızneske kedergi keltiretin júıeli máselelerdi anyqtap, ýákiletti organdarmen birlesip sheshý joldaryn tabý maqsatyndaǵy forýmda, sondaı-aq 4,7 mlrd teńgege kásipkerlerdiń múliktik quqyqtary qorǵalǵany aıtyldy.
Sotta 57 istiń 26-sy kásipker paıdasyna sheshilgen. Keńeste qaralǵan 34 másele boıynsha 191 usynystyń 78%-y oryndaldy. «Bızneske jol» jobasy aıasynda 30 otyrysta 55 másele talqylanyp, 19-y oń sheshimin tapqan. Oblys prokýrory Murat Tleýberdıev, Sybaılas jemqorlyqqa qarsy is-qımyl agenttigi Túrkistan oblysy boıynsha departamentiniń basshysy Murat Tóleýbaev, oblystyq polısııa departamentiniń bastyǵy Murat Qabdenov, oblystyq máslıhat tóraǵasy Nuraly Ábishov, oblys ákiminiń orynbasary Talǵat Qozbekov quqyq qorǵaý jáne baqylaýshy memlekettik organdardyń, oblystyq basqarmalardyń ókilderi jáne 100-ge jýyq kásipker men ınvestor qatysqan forýmda mańyzdy baıandamalar jasalyp, tıisti usynystar berildi.
Forým qorytyndysy boıynsha kásipkerler kótergen máseleler baqylaýǵa alynyp, árbir másele boıynsha naqty ýákiletti organ jaýapty bolyp bekitildi.
Túrkistan oblysy