Bıyl jyl basynan beri áleýmettik-eńbek salasyndaǵy memlekettik qyzmetterdi kórsetý maqsatynda 221,6 myń adamǵa SMS-habarlama joldanǵan. Nátıjesinde, 116,9 myń adam eshqaıda ótinish qaldyrmaı, járdemaqy, sondaı-aq basqa da tólemderdi alý múmkindigin paıdalanǵan. Kól-kósir jumys otbasynyń sıfrlyq kartasyn iske qosqan soń úılesim tapty.
Otbasynyń sıfrlyq kartasy memlekettik organdardyń qoldanystaǵy barlyq aqparattyq júıeleriniń derekteri negizinde qalyptasady. Qazir onda 20 mıllıon azamat nemese 6,2 mıllıonnan astam otbasy týraly aqparat jınaqtalǵan. Múmkindigi mol sıfrlyq kartany engizýdegi negizgi maqsat memlekettik qoldaý júıesi otandastardyń barlyǵyna teńdeı qoljetimdi bolsa degen usynystan týǵan. Osyǵan baılanysty otbasynyń sıfrlyq kartasy Áleýmettik kodekske áleýmettik saıasattyń orta jáne uzaqmerzimdi mindetteri men baǵyttaryn aıqyndaý quraly retinde belgilengen. Sondaı-aq sıfrlyq karta azamattardyń áleýmettik mártebesine baılanysty kepildendirilgen memlekettik qoldaýdyń qandaı da bir túrin alýǵa quqyly ekenin eskertip otyratyn elektrondyq habarlama.
Búginde Otbasynyń sıfrlyq kartasy memlekettik qoldaý sharalaryn alýǵa quqyǵy bar otandastarǵa qandaı da bir ótinishsiz járdemaqy men áleýmettik tólemderdiń 11 túrin resimdeýge múmkindik beredi. Olardyń ishinde eńbek etý qabiletinen aıyrylǵan jaǵdaıda áleýmettik tólem, jumysynan aıyrylǵan jaǵdaıda áleýmettik tólem, asyraýshysynan aıyrylý boıynsha áleýmettik tólem, bala týý men kútimine járdemaqy, múgedektigi bar balany tárbıelep otyrǵan ata-anasyna (qamqorshysyna) járdemaqy, múgedektigi boıynsha járdemaqy, kópbalaly otbasylarǵa beriletin járdemaqy, «Altyn alqa», «Kúmis alqamen» marapattalǵan kópbalaly analarǵa beriletin járdemaqy, ataýly áleýmettik kómek, sondaı-aq jerleýge arnalǵan birjolǵy tólem bar.
Budan ózge, sıfrlyq karta arqyly zeınetaqy tólemderin alý múmkindigi, «qandas» mártebesi berilgende nemese uzartylǵanda mártebeniń aıaqtalý merzimi, jumyssyz adamdarǵa jumyspen qamtý sharalary týraly avtomatty habarlamalar joldanady. Memlekettik qoldaý sharalaryn alýǵa quqyq belgilengen kezde áleýetti alýshyǵa 1414 biryńǵaı baılanys ortalyǵynan SMS-habarlama jiberiledi. Habarlama alǵan azamat oǵan kelisimi týraly jaýap berýi kerek. О́tinishti resimdeý, áleýmettik járdemaqy nemese tólem taǵaıyndaý avtomatty rejimde júrgiziledi. Osydan keıin qarajat tólem alýshynyń bank shotyna aýdarylady.