Inessa Vysoskaıany Ertis-Baıan óńirindegi analardyń kóbi kindik sheshemiz dep maqtan tutady. Aq jeleńdi abzal jan aýrýy asqynyp aldyna kelgen myńdaǵan anaǵa operasııa jasap, sábıleriniń ómirin qutqaryp qalǵan. Áriptesteri ony óz isiniń mamany retinde qurmetteıdi.
Inessa Valerevna 1997 jyly Semeı memlekettik medısınalyq akademııasyn támamdaǵan soń, týǵan qalasy Pavlodarǵa oralýdy jón dep sheshti. Munda birden analardy bosandyrý qyzmetine aralasyp, perzenthana isin tájirıbe turǵysynan meńgere bastady. Búginde bul qyzmette qatarynan 28 jyl eńbek etip jatyr. Qazirgi qyzmeti – óńirlik perınataldyq ortalyq bas dárigeriniń emdeý isi jónindegi orynbasary.
«Perınataldyq ortalyq – qaterli toptaǵy júkti áıelderge bosaný ústindegi, bosanǵannan keıingi kezeńde joǵary mamandanǵan akýsherlik-gınekologııalyq jáne neonatologııalyq kómek kórsetetin, sonymen qatar shala týǵan nárestege kútim jasaıtyn elimizdegi eń iri mekemeniń biri. Kez kelgen operasııanyń túrin jasaýǵa mamandandym. Aýrýy asqynǵan, ishtegi sábıiniń patologııalyq belgileri bar analar úzbeı túsip jatady. Olardyń barlyǵyna kómek kórsetý, janyna súıeý bolý, óziniń jáne sábıiniń ómirine arasha túsý – kúndelikti jumysymyzdyń basty mıssııasy», deıdi dáriger.
Áriptesteri keıipkerimizdiń únemi alǵy shepte júretin kásibı maman ekenin aıtady. Eń kúrdeli, kólemdi operasııa oǵan tapsyrylady. Ásirese ana boıyndaǵy túrli akýsherlik aýytqýlar men aýrýlar kezinde operasııa jasaý – eń qıyn úderis. Mundaı kezeńde ananyń jatyrymen baılanysty ishki aǵzalaryn saqtap qalýǵa kóbirek kóńil bólinedi. Ishtegi sábıdiń uryqjoldasy kóp jaǵdaıda ózge múshelerge, jatyrǵa jabysyp qalatyny bar. Kesar tiligi arqyly jasalatyn operasııa jasaý sátinde dárigerler aǵzanyń ózge múshelerine meılinshe zaqym kelmeýin qadaǵalaıdy. Mundaı kúrdeli ári aýyr operasııalardy perınataldyq ortalyq mamandary keıingi 15 jylda úzbeı jasap júr.
«Ár dárigerdiń óz joly bar. Akýsherlik iste ádette ózgeris kóp bola qoımaıdy. Sebebi analardyń tabıǵı bosanýy ejelden jalǵasqan úderis qoı. Biraq keıingi ýaqytta analar men ishte jatqan shaqalaqtardyń boıynda kóptegen aýytqý jıi kezdesýine oraı akýsherlik-gınekologııalyq salada kóptegen aýqymdy ózgeris bolyp jatyr. 2008 jyldan bastap Dúnıejúzilik densaýlyq saqtaý uıymynyń usynysy boıynsha salmaǵy 500 gramm bolatyn balalardy bosandyryp alý normasy qabyldanǵan. Iаǵnı ana men balanyń densaýlyǵyna qaýip tónip tursa, júktiliktiń 22 aptasynan bastap bosandyryp alamyz. Este qalǵan bir jaǵdaı, 2019 jyly salmaǵy 470 gramm bolatyn sábıdi aman-esen dúnıege ákeldik. Ol bala qazirgi ýaqytta aman-esen, óz qatarlastaryn áldeqashan qýyp jetti. Eń bastysy – sábıdi tiri alyp qalý», dep áńgimesin sabaqtaı tústi dáriger.
Sóz sońynda Inessa Valerevna ár medısına qyzmetkeriniń maqsaty adamdarǵa qyzmet etý ekenin eske saldy. Al perınataldyq iste jyldam oılanyp, shuǵyl áreket etý, jyldam sheshimder qabyldaý mańyzdy. Dárigerdiń mindeti – ana men sábıdiń ómirin barynsha aman qalýǵa tyrysý. Ana júktilik kezeńinde barlyq faktorlardy esepke alyp, dáriger mamandardyń baqylaýynda bolýy kerek. Mamandardyń aqyl-keńesine únemi qulaq túrip, yqtımal qaýipti jaıttardyń aldyn alyp otyrsa, ómirge deni saý sábı ákelýdiń múmkindigi arta túsedi.
Pavlodar oblysy