15 maýsym – Ákeler kúni. Bul kún – urpaqqa úlgi bolǵan, ónegeli ómirimen jol kórsetken ákelerge qurmet bildiretin ataýly data. Osy oraıdy Atyraý qalasyndaǵy Ulttyq ulannyń 5546 áskerı bóliminde qyzmet etip júrgen kishi serjant Altynbek Amanǵalıev pen onyń ákesi 3 synyp serjanty Rústembek Bekmýrzınniń taǵylymdy ómir joly nazar aýdartady, dep jazady Egemen.kz.
Kishi serjant Altynbek Amanǵalıev bala kúninen áskerı kıim kıgen, el qorǵany bolǵan ákesine qarap boı túzegen. Qazirgi tańda ol áskerı bólimde tártip pen jaýapkershilikti basty ustanym etip, naǵyz sarbaz retinde qalyptasyp keledi.
— Bala kúnimnen áskerı qyzmetshi bolýdy armandadym. Áskerı joldy tańdaýyma, árıne, eń aldymen ákem sebepker boldy. Onyń jumysqa degen jaýapkershiligi, temirdeı tártibi men Otanǵa adaldyǵy meni jigerlendirdi. Qazir ózim de áskerı salada qyzmet etip júrip, bul salanyń ońaı emestigin, biraq mártebeli mindet ekenin shyn júrekten sezinýdemin, — deıdi A. Amanǵalıev.
Ulynyń bul tańdaýy – 25 jylǵa jýyq ómirin Ulttyq ulanǵa arnaǵan Rústembek Bekmýrzın úshin zor maqtanysh.
— Áskerı salada júrgenime 25 jylǵa jýyqtady. Qazir rota starshınasy qyzmetindemin. 5 aıdan keıin zeınetke shyǵamyn. Úsh ulym bar. Úlken ulym – Altynbek meniń izimdi jalǵap, áskerı qyzmetke keldi. Al ekinshi ulym áskerge ketkeli jatyr. Boryshyn abyroımen ótep kelgen soń, ol da osy joldy tańdaýǵa nıetti. Bul – men úshin úlken mártebe. Urpaǵymnyń el qorǵany bolýǵa umtylysy – naǵyz áke armany, — deıdi 3 synyp serjanty.
Memleket qaýipsizdigi men qoǵamdyq tártip jolynda qyzmet etý – úlken jaýapkershilik pen erlikke toly mindet. Osyndaı aýyr júkti arqalap júrgen áskerı ákelerdiń ónegeli jolyn jalǵaǵan uldardyń qatary artqany – qýantarlyq jaıt. Olar – otansúıgishtiktiń, tártip pen tektiliktiń naqty kórinisi.
Qoǵamda áke jolyn qýyp, áskerı salada abyroımen qyzmet etip júrgen jastar az emes. Bul – ultqa qorǵan, elge tirek bolar azamattardyń ósip kele jatqanyn bildiredi.
Egemen elimizdiń erteńi úshin eńbek etip júrgen barsha ákelerdi Ákeler kúnimen shyn júrekten quttyqtaımyz! Otanǵa qyzmet etý – urpaqqa úlgi bolar bıik borysh!