Memleket basshysynyń 2025 jyldy «Jumysshy mamandyqtar jyly» dep jarııalaǵaly biraz jumys atqarylyp jatyr. Sonyń aıasynda Astanada «Altyn Gefest» taý-ken metallýrgııa ónerkásibiniń salalyq baıqaýy bıyl 15-shi ret uıymdastyrylyp, onda elimizdegi taý-ken metallýrgııa salasyndaǵy adal azamattar marapattalǵan. Solardyń biri — Kúlken Dagılova, dep jazady Egemen.kz.
«Jumysshy mamandyqtar» jylynda jumysshylardyń eńbegin baǵalap, qoldaýmen qatar kásiptik bilim berý salasyndaǵy qarqyndy jobalardyń júzege asýy da – Abaı eliniń eńbekshileri úshin úlken qýanysh.
Bıylǵy baıqaýda kásiptik bilim berý salasyndaǵy mańyzdy nomınasııanyń biri «Jyl tálimgerin» jeńip alǵan – Aqtoǵaı ken baıytý fabrıkasynyń flotatory Kúlken Dagılova.
«Eńbek jolymdy Balqash ken baıytý fabrıkasynan bastadym, 2016 jyly Aqtoǵaı ken baıytý fabrıkasyna keldim.Tálimgerlerim kóp, meni tárbıelegen ustazdarym da myqty» deıdi, flotasııa salasyna 22 jylyn arnaǵan bilikti maman. Jyl tálimgeri jas mamandy úıretýdiń esh qıyndyǵy joq dep sanaıdy.
«Shyn nıetińmen jumysqa baýlysań, úıretseń, kez kelgen dúnıe jeńil bolady. Úırenedi, úırenbeıtin adam bolmaıdy. Árıne, shydamdylyq kerek, isin súıe bilý kerek. Mamandyǵyn súıgen adam bárine tózedi, qıyndyǵyna kónedi, úırenedi. Bir maman tez qaǵyp alady, al endi birine ýaqyt kerek, onyń bárine shydaý kerek», – deıdi Kúlken Dagılova.