Elimizde kópirlerdi basqarýdyń biryńǵaı júıesine pılotsyz ushý apparattary, sıfrlyq kóshirmeler men jedel monıtorıng ádisteri engizilip jatyr. Sıfrlandyrý ınfraqurylym qaýipsizdigin arttyryp, ony kútip ustaýǵa ketetin shyǵyndy azaıtady.
Qazaq jol ǵylymı-zertteý ınstıtýty (QazjolǴZI) kópirlerdiń tehnıkalyq jaı-kúıin dıagnostıkalaý, baqylaý jáne boljaý boıynsha málimetterdi qamtıtyn Kópirlerdi paıdalaný jáne basqarý júıesin – biryńǵaı sıfrlyq platformany iske asyryp jatyr. Joba aıasynda Pavlodar, Oral men Astana aınalma joldary syndy kúrdeli qurylymdardy qosa alǵanda, 100-den astam kópir tekserildi. Búginde olardyń úsh ólshemdi sıfrlyq kóshirmesi ázirlenip, ol qurylymdardyń jaı-kúıin qashyqtan baqylaýǵa jáne táýekelderge jedel den qoıýǵa múmkindik berip otyr.
Bıyl taǵy 60 kópirdi tekserip, olarǵa sıfrlyq kóshirme jasaý josparlanǵan.
«Júıe reaktıvti qyzmet kórsetýden proaktıvti basqarýǵa kóshýge jol ashady. Biz el aýmaǵynda biryńǵaı sıfrlyq baza quryp, tekserý nátıjesin biriktirip jatyrmyz. Baqylaýdyń avtomattandyrylǵan ádisterin de engizip otyrmyz. Bul kópirdiń qaýipsizdigi men kútimine degen kózqarasty túbegeıli ózgertedi», deıdi «QazjolǴZI» kópir jáne jol qurylystary basqarmasynyń basshysy Shalqar Qaısar.
Búginde elimizde 3 500-den astam kópir paıdalanylady. Olardyń kóbi óńirlik jáne jergilikti joldarda ornalasqan. Birazy paıdalaný merziminiń shegine jetken jáne turaqty tekserý men tehnıkalyq baqylaýdy qajet etedi.