Bıylǵy 5 aıda Atyraý munaı óńdeý zaýytynda óńdelgen kómirsýtekti shıkizat kólemi osynsha mejege jetti. Zaýyttyń bas dırektory Qýanysh Bıshımovtiń málimetinshe, jeńil munaı ónimderiniń negizgi túrleri boıynsha oń dınamıka baıqalady. Dızel otynyn óndirý 786,1 myń tonnaǵa deıin ósti. Bul – josparlanǵan kólemnen 66,7 myń tonnaǵa (nemese 9%-ǵa) artyq. Osy kezeńde 105,5 myń tonna suıytylǵan munaı gazy shyǵarylyp, jospar 12%-ǵa artyq oryndalǵan.
«Barlyq markaly avtomobıl benzınin shyǵarý kólemi 775,2 myń tonna boldy. Ásirese AI-95 joǵary oktandy benzın óndirisiniń kólemi 16%-ǵa ósip, 140,8 myń tonnaǵa jetti. Jyl basynda 7,8 myń benzol shyǵarý kózdelgen edi. Bes aıda bul ónimniń óndirisi edáýir ósip, 24,6 myń tonna boldy», deıdi Q.Bıshımov.
Bas dırektordyń dereginshe, kásiporynda mazýt óndirisi qysqarǵan. Biraq bul neǵurlym qundy jeńil munaı ónimderi óndirisin ulǵaıtý strategııasyna saı keledi. «Zaýytta sapa kórsetkishteri jaqsardy. Máselen, munaı óńdeý tereńdigi 89%-ǵa jýyqtady. Jeńil munaı ónimderin shyǵarý kólemi 77%-ǵa jetip, josparlanǵan kórsetkishten asyp otyr», deıdi bas dırektor.
Kómirsýtekti shıkizatty óńdeý salasyndaǵy kásiporynnyń burynǵy tarıfi 1 tonna munaıdy óńdeýge 54 450 teńge edi. 1 mamyrda jańa tarıf bekitildi. Endi qosylǵan qun salyǵyn esepke almaǵanda, bir tonna úshin 47 000 teńge bolmaq. Bul burynǵy tarıften 7 450 teńgege arzan. Kásiporynǵa tarıfti tómendetýdiń qandaı tıimdiligi bar? Birinshiden, mundaı sheshim munaı óndirýshi kompanııalardyń tabysyn teńestirý úshin qabyldanyp otyr. Ekinshiden, elimizdegi barlyq munaı óńdeý zaýytyna munaı jetkizýshilerge birdeı jaǵdaı jasaýǵa ári ekonomıkalyq ahýaldy teńestirýge yqpal etedi. Úshinshiden, ishki naryqtaǵy munaı ónimderin odan ári nyǵaıtýǵa jol ashady.
Kásiporyn baspasóz qyzmetiniń málimdemesinde tarıftiń tómendeýi AMО́Z kredıttik mindettemelerin óteý kestesin ońtaılandyrý nátıjesinde múmkin boldy delingen. Qazir zaýytta óndiris qaýipsizdigine basa nazar aýdarylyp otyr. Taıaýda «QazMunaıGaz» kompanııasynyń 2025–2027 jyldarǵa arnalǵan óndiristik qaýipsizdik, eńbek jáne qorshaǵan ortany qorǵaýdyń jaı-kúıin jaqsartý jónindegi jol kartasy aıasynda zaýyt qyzmetkerleri betpe-bet soqtyǵysty ımıtasııalaıtyn qurylǵyny synaqtan ótkizdi.Eńbek qaýipsizdigi jónindegi bas tehnıkalyq jetekshi Arman Dımuqashevtiń aıtýyna qaraǵanda, qurylǵy saǵatyna 10 shaqyrymǵa deıingi jyldamdyqtaǵy betpe-bet soqtyǵys kúshine tótep beredi.
Atyraý oblysy