«Áziret Sultan» ulttyq mýzeı-qoryǵy saıtynda mekemeniń nýmızmatıkalyq jádigerler qorynda saqtalǵan teńge-tıyn (pýl) týraly málimet jarııalandy. Bul buıym kezinde Syǵanaq qalasynda soǵylǵan eken. Jádigerdi mýzeı qoryna 2004 jyly Túrkistan qalasynyń turǵyny N.Dosmetov esimdi azamat tapsyrypty.
Mýzeılik anyqtamalyqta tıynnyń qaıdan tabylǵany jáne qaıda saqtalǵany týraly málimet joq. Mekemeniń kishi ǵylymı qyzmetkeri Tolqyn Joldasovtyń aıtýyna qaraǵanda, moneta mystan jasalǵan. Saqtalý jaǵdaıy – nashar. Pishini – sheńber poshymdy dóńgelek. Tıynnyń aınala jıegi mújilý sebebinen keıbir tańbalary tozǵan. Tipti keıbir beder izderi joıylyp ketýge jaqyn. Eń ókinishtisi, tıyn soǵylǵan ýaqyt (jyly) shekitilgen tus synyp túsken.
– Biraq, – deıdi kóne tańbalar bilgiri Tolqyn Mahanbetuly. – Jádigerdiń aman saqtalǵan bóligindegi jazý-tańbalarǵa qarap, tıyn hıjranyń 727, 728, 738 jyldary Syǵanaq aqsha saraıynda soǵylǵanyn ańǵarýǵa bolady. Oǵan dálel – tıynnyń ortasyndaǵy sharshy pishindi kartýsh ishinde úsh qatar jazba. Onda «Zarb / Syǵna / q» (Syǵanaq) dep tańbalanǵan. Taǵy bir dálel: Orta Azııa jáne Qazaqstan nýmızmatıkasy salasyndaǵy iri maman Raıhan Býrnashevanyń eńbekterinde Syǵanaq tıyndarynyń osyndaı úlgileri kóp kezdesedi.
«Jádigerdiń taǵy bir ereksheligi, orta ǵasyrda aınalymda bolǵan pýldarmen tıptes. Al «pýl» degenimiz – Altyn Orda dáýirinde mystan soǵylǵan teńge-tıyndardyń tarıhı ataýy. Mundaı tıyndar XII ǵasyrdyń aıaǵy men XVI ǵasyrdyń basynda qoldanyla bastaǵan. Onyń negizgi sebepteriniń biri, dál osy ýaqytta aýmaqta mys aqshalarmen ǵana atqarylatyn usaq saýdanyń úlken qarqynda damýy – mystan soǵylǵan aqshalardyń negizgi tólem quraly retinde bekýine jaǵdaı jasady. Sondyqtan eń kóp qoldanylatyn aqsha túrinde pýl ataýy jalpy aqsha ataýyna balana bastady» deıdi T.Joldasov.