El ishinde kúndelikti tutynatyn qyzmetter men taýarlardyń quny taǵy da óse bastady. Bul joly baǵa qubylýy uıaly baılanys, elektr energııasy jáne halyqaralyq emtıhandar salasynan baıqaldy. Ásirese, turǵyndar úshin turmystyq qyzmetterdiń qaltaǵa túser salmaǵy aýyrlaı tústi. Maýsym aıynan bastap mobıldi tarıfter ózgerip, jaryqtyń quny qymbattady, al IELTS emtıhanyna qatysý baǵasy burynǵydan da joǵary deńgeıge kóterildi, dep jazady Egemen.kz.
Tele2 tarıfteri qymbattady
2025 jylǵy 2 maýsymnan bastap Tele2 uıaly baılanys operatory birqatar tarıftik josparlarǵa sáıkes abonenttik tólem men qyzmet kólemin jańartty.
«Kompanııa jelini damytý men jańǵyrtý, ony kútip-ustaý jáne jóndeý jumystaryna, sonymen qatar jabdyqtardyń qymbattaýyna baılanysty keıbir tarıfterdi qaıta qarady», delingen resmı habarlamada.
Elektr energııasynyń tarıfi de ósti
2025 jylǵy 1 maýsymnan bastap Taldyqorǵanda elektr energııasynyń ortasha bosatý tarıfi 1 kVt/saǵ úshin 36,16 teńgeni (QQS-syz) qurady. Bul týraly 25 sáýirde jarııalanǵan resmı habarlamada aıtylǵan.
Energetıka jáne turǵyn úı-kommýnaldyq sharýashylyq basqarmasynyń bólim basshysy Manar Abdambaevtyń aıtýynsha, tarıftiń ósýine birqatar faktorlar áser etken.
«Basty sebep — elektr energııasyn jetkizý men taratý qyzmetteriniń qymbattaýy. Aımaqtyq jáne aımaqaralyq jelilik uıymdardyń tarıfteri 33,4 paıyzǵa deıin ósken. Bul ótken jylmen salystyrǵanda 3,82 teńgege (QQS-syz) artyq», dedi ol.
Sonymen qatar, elektr qýatynyń daıyn bolýyn qamtamasyz etý qyzmetiniń baǵasy da aıtarlyqtaı artqan. Biryńǵaı satyp alýshynyń jańa esebi boıynsha MVt/aıyna 454,3 mıllıon teńge kóleminde ósim tirkelgen. Bul – 20 paıyzdan joǵary.
Almatyda da jaryq quny kóteriledi1 maýsymnan bastap Almaty qalasynda da elektr energııasynyń tarıfi ósýi múmkin. Qazirgi ýaqytta bul ózgeristerge qatysty joba tıisti saraptamadan ótip jatyr.
Qazir qala turǵyndary jaryq úshin 1 kVt/saǵ-qa 27,59 teńge (QQS-syz) tólese, jańa jobaǵa saı bul kórsetkish 29,52 teńgege deıin jetpek. Al jeke kásipkerler men kommersııalyq jalǵa alýshylar úshin tarıf 38,66 teńgege, al memlekettik mekemeler úshin 111,72 teńgege deıin ósýi yqtımal.
Sondaı-aq, elektr qýatyn tutyný kólemine qaraı saralanǵan tarıfterdi de qaıta qaraý usynylǵan. Iаǵnı, qanshalyqty kóp tutynsańyz – sonshalyqty qymbat tóleısiz. Joba qazirgi tańda Tabıǵı monopolııalardy retteý departamentinde qaralýda. Eger maquldansa, jańa tarıfter osy maýsymda-aq kúshine enedi.
Aıta keteıik, sońǵy bir jylda Qazaqstan boıynsha elektr energııasy tarıfi orta eseppen 12 paıyzǵa ósti. Buǵan deıin elordada da osyndaı ózgerister bolǵany habarlanǵan.
IELTS emtıhany da qymbattady
2025 jylǵy 1 maýsymnan bastap Qazaqstanda IELTS halyqaralyq emtıhanynyń baǵasy da resmı túrde ósti. Bul ózgeris aldaǵy jazda jáne keıingi aılarda test tapsyratyn úmitkerlerge qatysty.
Jańa baǵalar kelesideı:
IELTS Academic / General Training — 94 500 teńge
IELTS UKVI — 106 000 teńge
IELTS Life Skills — ózgerissiz
Get Education uıymynyń resmı saıtynda jarııalanǵan túsindirýde aıtylǵandaı, baǵa ósýiniń sebebi birneshe faktorǵa baılanysty. Olardyń ishinde valıýta baǵamynyń ózgerisi, testti uıymdastyrý shyǵyndary, formatty jańartý, logıstıka men jalǵa alý tólemderi bar.
«Bul — jyl saıynǵy josparly ózgeris. 2025 jyl da bul dástúrden tys qalǵan joq», delingen habarlamada.
Saıyp kelgende, maýsym aıynan bastap kúshine engen tarıftik ózgerister halyqtyń áleýmettik jáne ekonomıkalyq turmys-tirshiligine tikeleı yqpal etip otyr. Elektr qýaty men baılanys qyzmetiniń quny ósken jaǵdaıda tutynýshylar shyǵyndaryn qaıta esepteýge májbúr. Al halyqaralyq emtıhan baǵasynyń kóterilýi bilimge umtylǵan jastardyń josparlaryna áser etýi múmkin. Sondyqtan baǵanyń negizsiz ósýine jol bermeı, tarıftik saıasattyń ashyqtyǵy men negizdiligin qamtamasyz etý – búgingi kúnniń ózekti mindeti.