Sala mınıstrliginiń málimetinshe búginde aýyl sharýashylyǵy alqaptarynyń 2 mıllıon gektary óńdelgen. Zııankestermen kúres sharalaryna 443 arnaıy búrikkish tehnıka, sonyń ishinde 49 dron jumyldyrylǵan. Zertteý jumystaryn 3,5 myńnan astam adam júrgizip jatyr, dep habarlaıdy Egemen.kz.
Jergilikti jerlerdegi jumysty oblys ákimderiniń orynbasarlary basqaratyn jedel shtabtar úılestirip otyr.
Shekara mańyndaǵy aýmaqtar baqylaýda tur. Naqty ataǵanda, 2-6 maýsym aralyǵynda Qazaqstan men Qyrǵyzstannyń shekara mańy aýmaqtarynda birlesken zertteýler júrgizilse, 9-13 maýsymda QHR mamandarymen birlesken zertteýler ótti. Qazirgi ýaqytta Qyrǵyzstan men Qytaı tarapynan shegirtkelerdiń ushyp kelýi men kóshý qaýpi joq.
Reseımen jáne О́zbekstanmen shekaralas aýmaqtarda shegirtkelerdiń taralý oshaqtary anyqtalmaǵan.
Shegirtkelerdi baqylaý jáne olarǵa qarsy kúres sharalary josparly túrde jalǵasyp jatyr.