ShQO-ǵa qarasty Ulan aýdanynda týrızm salasy qarqyndy damyp keledi. Sońǵy úsh jyl ishinde munda 2,7 mlrd teńgeniń jobasy júzege asyrylyp jatyr. Saladaǵy damý rekreasııalyq aımaqtardy damytý jospary aıasynda júrgizilýde jáne ol tabıǵı-mádenı nysandardy qamtıdy, dep jazady Egemen.kz.
– Bıyl Shybyndykóldiń jaǵasynda jańa demalys bazasynyń qurylysy bastalady. Investor – «QaiMak Resort» JShS. Investısııa kólemi – 250 mln teńge. Sonymen qatar, Tarǵyn aýylynda kafe men sanıtarlyq aımaǵy bar jol boıyndaǵy keshen ashylady. Bul aýdan boıynsha týrıstik baǵyttardyń tartymdylyǵyn arttyrady, – deıdi Ulan aýdany ákiminiń orynbasary Lıazıza Kenjetaeva.
Dubyǵaly, Aıyr jáne Shybyndykól mańyn abattandyrý qolǵa alynyp, «Bagratıon» pantamen emdeý shıpajaıyn 40 tósek-orynǵa keńeıtýge kóńil bólindi. Tarıhı-mádenı nysandar Ablaıkıt, Aqbaýyr arheologııalyq keshenderi men Bozanbaı aýylyndaǵy Búrkittóbe alańyn damytýǵa erekshe nazar aýdaryldy.
Sonymen qatar, 7 ekskýrsııalyq marshrýt ázirlengen. Olardyń qatarynda «Medvedka – Toǵanas – Besterek» ekologııalyq soqpaǵy bar. Bul jerde týrısterdiń yńǵaılylyǵy úshin kıiz úıler, fotozonalar men baspaldaq ornatý josparlanǵan. Aýyl týrızmine de erekshe mán berile bastady. Qonaqtarǵa dástúrli úılerde tynyǵyp, óńir mádenıetimen jaqynyraq tanysý usynylady.
2024 jyldyń qorytyndysy boıynsha Ulan aýdanyna 13,8 myń týrıst kelgen. Ornalastyrýdan túsken kiris 261,6 mln teńgeni qurady. Aýdannyń ımıdji halyqaralyq deńgeıdegi is-sharalardyń, sonyń ishinde álemniń túkpir-túkpirinen búrkitshiler jınalatyn «Shyǵys salbýryny» festıvaliniń arqasynda nyǵaıyp keledi.
Shyǵys Qazaqstan oblysy