О́tken aıda Enbek.kz elektrondy eńbek bırjasynda 86 myń bos jumys orny men 110 myń túıindeme ornalastyrylypty. Aldyńǵy aımen salystyrǵanda suranys pen usynystyń azaıǵany baıqalady.
Mamandarǵa eń kóp suranys ádettegideı bilim berý salasyna tıesili. Munda 15 myńnan astam bos jumys orny usynylǵan. Sondaı-aq qyzmet kórsetýdiń basqa túrlerine 10,7 myń, qurylys salasyna 8,5 myń jumysshy izdegen. Suranys negizinen iri qalalar men agroónerkásiptik aımaqtarda shoǵyrlanǵan. О́tken aıda orta bilikti mamandardyń tapshylyǵy baıqalǵan. Suranys usynystan 16%-ǵa asyp túsken. Sonymen qatar joǵary bilikti laýazymdarǵa jumys izdeýshiler tarapynan básekelestik kúsheıdi.
Jumys berýshilerdiń kóptigi jóninen Astana qalasy alda tur. Elorda jyl saıyn keńeıip, kórkeıip, záýlim ǵımarattar salynyp jatqanyn, halyq sany kóbeıgenin eskersek, jumysshylarǵa suranystyń kóp bolýy zańdylyq. Elektrondy eńbek bırjasynda tirkelgen barlyq bos jumys oryndarynyń 11,5%-y osy qalaǵa tıesili. Astanadan keıin Túrkistan (7,5%), Pavlodar (7,1%) oblystary tur. Birqatar óńirde bos jumys oryndar sanynyń tórtten biri qysqarǵan. Mysaly, Batys Qazaqstan oblysynda – 36%, Almatyda – 35%, Mańǵystaýda – 34%, Ulytaýda 25% azaıǵan.
Jumys izdeýshilerdiń eń belsendi sanaty burynǵysha 34 jasqa deıingi azamattar. Olar barlyq túıindemeniń 44%-yn quraıdy. Orta jastaǵy úmitkerlerdiń túıindemeleri – 37%. Jumys izdeýshilerdiń 52,8%-yn áıelder, 47,2%-yn erler quraıdy. Jumys izdeýshiler belsendiliginiń tómendeýi Almaty qalasynda (-28%) baıqaldy.
Suranysqa ıe mamandyqtardyń ishinde tártip saqshylaryna 1,8 myń bos orny usynylǵan. Sol sekildi meıirgerlerge 1,7 myń oryn, júrgizýshilerge 1,5 myń jumys orny tirkelgen. Jalaqy jónindegi eń kóp usynys taý-ken ónerkásibindegi basshynyń orynbasaryna túsken. Munda jalaqy orta eseppen 788 myń teńgeden bastalady. Sol sekildi bas qurylysshyǵa 662 myń, burǵylaýshy-ınjenerlerge 605 myń teńge tóleımin degen jumys berýshiler bolǵan. Jumys izdeýshiler arasynda eń joǵary jalaqy kútetin ushqyshtar eken. Olar orta eseppen 2,3 mln teńgeden joǵary jalaqy suraıdy. IT jobalardy ázirleý bóliminiń basshylyǵyna 1,2 mln teńge, óndirýshi saladaǵy ýchaske basshylyǵynda 1,1 mln teńge jalaqyǵa jumys isteýge daıyn azamattar bar.
Jalpy, keıingi kezde jumys berýshilerdiń ǵana emes, jumys izdeýshilerdiń belsendiligi tómendegeni baıqalady. Burynǵysha jumysshy mamandyq ıeleri, júrgizýshiler, kúzetshiler, medısına qyzmetkerleri suranysqa ıe mamandardyń aldyńǵy shebinde qala beredi.