Sala mınıstrliginiń málimetinshe ırrıgasııa jáne drenaj júıelerin jetildirý jobasynyń ekinshi kezeńi 74,5 myń gektar jerdi sýmen qamtý sapasyn jaqsartýǵa múmkindik berdi. Nátıjesinde Irrıgasııa jelilerindegi sý shyǵyny jylyna 193 mln tekshe metrge deıin azaıdy. Joba Almaty, Jambyl, Qyzylorda, Túrkistan oblystary aýmaǵyndaǵy 11 nysandy qamtıdy. Jobanyń ekinshi kezeńin jyl sońyna deıin aıaqtaý josparlanyp otyr, dep jazady Egemen.kz.
Sý sharýashylyǵy komıteti tóraǵasynyń orynbasary Nurbek Serikovtiń aıtýynsha jobany tolyq iske asyrý nátıjesinde sýarmaly sý shyǵynyn jylyna 360 mln tekshe metrge deıin qysqartýǵa, transshekaralyq sý kózderine táýeldilikti azaıtýǵa jáne kanaldardyń tıimdiligin 40-70%-ǵa deıin arttyrýǵa gıdromelıoratıvtik jaǵdaı jasalady.
«105 myń gektar jerdiń sýmen qamtamasyz etilýi men jaǵdaıy jaqsarady, sondaı-aq jergilikti turǵyndar úshin 20 myńǵa deıin turaqty jumys orny ashylady», dedi Nurbek Serikov.
Jambyl oblysynda 10 myń gektar egis alqabyn sýmen qamtamasyz etetin eki nysan paıdalanýǵa berilse, Qyzylorda oblysynda 15,1 myń gektar jerdi sýmen qamtamasyz etetin nysanda qurylys-montaj jumystary aıaqtaldy.
2025 jyldyń maýsym aıynyń basyna qaraı joba aıasynda 3064,88 shaqyrym kanal (88,3%), 1280,87 shaqyrym kollektor (80,4%), 26 593 gıdrotehnıkalyq qurylym (81,6%), 426 baqylaý uńǵymasy (92,4%), 222 tik drenaj uńǵymasy (100%) rekonstrýksııalandy.
Qazirgi ýaqytta 8 nysanda qurylys-montaj jumystary jalǵasyp jatyr.