Y.Altynsarın atyndaǵy Ulttyq bilim akademııasy «Eńbek resýrstaryn damytý ortalyǵy» AQ-men birlesip oqýshylarǵa kásiptik baǵdar berýdiń «Oqýshynyń qyzyǵýshylyqtary men daǵdylarynyń ıkemdi beıini» (OQDIB) sıfrlyq ádistemesin ázirledi, dep habarlaıdy Egemen.kz.
Otandyq mazmunǵa beıimdelgen atalǵan ázirleme elimiz boıynsha 10 myńnan astam oqýshy qatysqan synaqtan ótken.
Y.Altynsarın akademııasynyń prezıdenti Názıpa Aıýbaevanyń aıtýynsha, atalǵan qural ýnıversıtetterdiń 400-den astam baǵdarlamasy, kolledjderdiń 200-ge jýyq mamandyǵy men jumysshy kásipterin biriktiretin Mansap kompasy sıfrlyq platformasyna engizilgen.
«Platforma oqýshylardyń, pedagogterdiń jáne ata-analardyń jeke kabınetterine qol jetkizýdi qamtamasyz ete otyryp, bir sıfrlyq keńistikte júıeli kásiptik baǵdarlaýdy qamtamasyz etedi. Test nátıjeleri avtomatty túrde óńdeledi: oqýshylar – jeke aqyl-keńester, pedagogter – zamanaýı súıemeldeý quraldaryn, al ata-analar – balanyń damý saraptamasy men dınamıkasy týraly aqparat alady», dep atap ótti N.Aıýbaeva.
Oqý-aǵartý mınıstrliginiń habarlaýynsha atalǵan bastama bolashaq kásipti erte jastan sanaly tańdaýdy qalyptastyrýǵa baǵyttalǵan jáne 7-9 synyp oqýshylaryna arnalǵan. Bul ádisteme oqýshylarǵa qyzyǵýshylyqtaryn aıqyndaýǵa, qabiletterin anyqtaýǵa jáne odan ári damý úshin ońtaıly baǵyttardy tańdaýǵa septesedi.