Memleket basshysynyń bıyl 15 sáýirde qol qoıǵan «Qazaqstan Respýblıkasynyń keıbir zańnamalyq aktilerine dene shynyqtyrý jáne sport máseleleri boıynsha ózgerister men tolyqtyrýlar engizý týraly» Zań 16 maýsymda kúshine endi, dep habarlaıdy Egemen.kz.
Týrızm jáne sport mınıstrligi ázirlegen atalǵan qujattyń negizgi jańalyǵynyń biri – QR-nyń azamaty emes sportshylardy memlekettik bıýdjet jáne kvazımemlekettik sektor sýbektileriniń qarajaty esebinen qarjylandyrýǵa tyıym salý. Bul norma el azamattarynyń sporttaǵy jáne qarjylyq qoldaýdaǵy basymdyǵyn qamtamasyz etýge baǵyttalǵan.
«Biz eń aldymen otandyq sportshylardyń tıisti deńgeıde daıyndalyp, joǵary jetistikterge jetýine jaǵdaı jasaǵymyz keledi», degen edi buǵan deıin sala mınıstri Erbol Myrzabosynov.
Mınıstrliktiń baspasóz qyzmetiniń málimdeýinshe atalǵan zań sheńberinde sondaı-aq kásibı sport klýbtaryn ustaýǵa memleket tarapynan qarjylandyrý lımıti belgilendi, bul – bıýdjet qarajatyn tıimdi ári ashyq paıdalanýǵa, klýbtardy qosymsha qarjy kózderin izdeýge yntalandyrýǵa jáne memlekettik bıýdjetke táýeldilikti azaıtýǵa baǵyttalǵan.
Jańa normalar sport salasynda turaqty ári tıimdi qarjylyq model qalyptastyrýǵa yqpal etedi. Endigi kezekte buqaralyq sportty damytýǵa, balalar men jasóspirimder sport mektepterine qoldaý kórsetýge jáne joǵary jetistikter sportyn ilgeriletýge basymdyq beriletin bolady.