Qazaqstanda júzdegen myń adam baqsha sharýashylyǵymen aınalysyp, kókónis, jemis-jıdek, jıdek túrlerin ósirý arqyly jergilikti naryqty tabıǵı ónimmen qamtamasyz etip keledi. Kópshilik úshin bul — qosymsha tabys kózi ǵana emes, otbasyn asyraýdyń mańyzdy amaly. Alaıda búginde baqsha alqaptarynda ınfraqurylym máselesi ótkir kúıinde qalyp otyr. Bul týraly Májilis depýtaty Ashat Aımaǵambetov habarlady.
Depýtattyń aıtýynsha, kóptegen baqsha seriktestikterinde turaqty sýarý júıesi joq, joldar nashar jaǵdaıda, turmystyq qaldyqtar der kezinde shyǵarylmaıdy. Atalǵan máselelerdi sheshýge jergilikti atqarýshy organdardyń ókilettigi men naqty jaýapkershiligi jetkiliksiz.
– Qazirgi zańnamada baqsha seriktestikteriniń quqyqtyq mártebesi naqty aıqyndalmaǵan. Olardyń quqyqtary men mindetteri belgisiz, kooperatıvterdiń qyzmeti de ashyq júrgizilmeıdi. Munyń bári baqshashylardyń tynys-tirshiligine keri áser etýde, – dedi Ashat Aımaǵambetov.
Sonymen qatar, azamattar baqsha ýchaskelerine salynatyn salyq mólsheriniń joǵary ekenine, sý men elektr qýatynyń tarıfteriniń qymbattyǵyna, iri aýyl sharýashylyq óndirýshilerge usynylatyn jeńildikter men sýbsıdııalarǵa qol jetkize almaıtynyna jıi shaǵymdanýda.
Osyǵan baılanysty bir top depýtat baqsha sharýashylyǵyn qoldaýǵa baǵyttalǵan zań jobasyn ázirledi. Bul bastamanyń negizgi maqsaty – usaq aýyl sharýashylyǵynyń bir bóligi retinde baqsha sharýashylyǵyn zań júzinde moıyndap, ony damytýǵa qolaıly jaǵdaı jasaý.
– Baqshashylarǵa qoldaý kórsetý – bul myńdaǵan qazaqstandyq úshin tabys kózi, otbasylyq kásip, eńbekke baýlý quraly. Jaz mezgilinde balalar men nemerelerdiń ata-anasymen birge baqshada eńbek etýi – tárbıeniń bir mektebi. Bul rette baqsha sharýashylyǵyn qoljetimdi, tıimdi ári yńǵaıly etip damytý – eldiń azyq-túlik qaýipsizdigine qosylatyn úles, – dedi Májilis depýtaty.
Aıta keteıik, depýtat «Vlast» portalyna bergen pikirinde baqsha alqaptaryndaǵy tirkeý (turaqty tirkeý orny) máselesi ázirge zań jobasyna engizilmegenin, qujat ázirleý jumystary endi ǵana bastalǵanyn naqtylady.