Keshe elorda ákimdiginde Jeńistiń 70 jyldyǵyna oraı Uly Otan soǵysy ardagerleri men tyl eńbekkerlerin Qazaqstan Respýblıkasynyń memlekettik nagradalarymen marapattaý rásimi ótti.
Memleket basshysy Nursultan Nazarbaevtyń Jarlyǵymen Astana qalasynda turatyn bir top Uly Otan soǵysy ardagerleri men eńbekkerleri memlekettik nagradalarmen marapattaldy. Astana qalasynyń ákimi Ádilbek Jaqsybekov Elbasy atynan memleket aldyndaǵy eren eńbegi, belsendi qoǵamdyq qyzmeti úshin jáne Uly Otan soǵysyndaǵy Jeńistiń 70 jyldyǵynyń qurmetine soǵys ardageri Shaǵıla Qusaıynovaǵa «Parasat» ordenin, soǵys ardagerleri Tezekpaı Ábdirahmanovqa, Qadan Bekenovke, Vladımır Kalsınge, Marııa Poltoraskaıaǵa, «Ardagerler uıymy» RQB Astana qalasyndaǵy bólimshesiniń tóraǵasy Amangeldi Syzdyqovqa «Qurmet» ordenin tapsyrdy. Soǵys ardagerleri Baımuhan Ábilov, Baqtybaı Almabekov, Aleksandr Morýnov, Shárip Rahymjarov, eńbek ardageri Qalı Muqataev, «Ardagerler uıymy» RQB Astana qalasyndaǵy bólimshesi tóraǵasynyń orynbasary Esbolat Dúısenov «Eren eńbegi úshin» medaldarymen marapattaldy.
– Sizderdi kele jatqan aıtýly mereke – Uly Jeńistiń 70 jyldyǵymen quttyqtaımyn. Jeńis kúni – biz erekshe tolqynyspen qarsy alatyn merekelerdiń biri. Bul mereke bizdi biriktirip qana qoımaı, Sizderge – jeńimpaz býynǵa elikteýge shaqyrady, – dedi ákim.
Sonymen qatar, soǵys ardagerleri Sıhymbaı Mamyrov pen Janııaz Shalbolovqa Qazaqstan Respýblıkasynyń qurmet gramotalary tabystaldy.
– Sizderdiń ómirlerińiz eren erlikke, qaharmandyqqa jáne tabandylyqqa toly. Soǵystyń aýyr zardabyn arqalap óttińizder. Soǵys jyldarynan keıin memleketti jandandyrýǵa qatystyńyzdar. Sizderdiń erlikterińiz biz úshin árqashan úlgi bolyp qalady. Sizderge densaýlyq pen jaqsylyq, otbasylaryńyzǵa baqyt tileımin! – dedi Ádilbek Jaqsybekov.
«Egemen-aqparat».