Kásipkerler palatasy uıymdastyrǵan jármeńkege óńirdegi 30-dan astam kásiporyn, kásipkerlik nysandary, túrli saladaǵy mekeme ókilderi qatysyp, 150-den astam jumys oryndaryn usyndy. Jármeńke óńirlik kásipkerler palatasy janyndaǵy saýda jáne qyzmet kórsetý salasy boıynsha salalyq keńestiń bastamasymen ótkizildi, dep habarlaıdy Egemen.kz.
Jumys berýshiler qatarynda kólik-logıstıka kompanııalary, balalardy damytý jáne bilim berý ortalyqtary, sporttyq seksııalar, tigin sheberhanasy, medısınalyq mekemeler, qurylys materıaldary men metall qurastyrmalaryn óndirýshiler, azyq-túlik dúkenderi, fıtnes ortalyqtary bar. Jármeńke barysynda elektrık, aýyr júk kólikteriniń júrgizýshisi, júk tıegishter men býldozer operatorlary, aspaz, mehanızatorlar eń kóp suranysqa ıe mamandyqtar ekendigi belgili boldy. Máselen «SL-Logıstıka» kompanııasyna «E», «D» sanatyndaǵy júrgizýshiler 15 kúndik vahtalyq jumysqa 700 myń teńge jalaqy alady. Sondaı-aq «QazTermoGrýpp» kompanııasy da elektrık-slesar mamandaryna joǵary jalaqy usynyp tur.
«О́ńirlik kásipkerler palatasy Jumysshy mamandyqtary jyly aıasynda bos jumys oryndary jármeńkesin alǵash ret ótkizip otyr. Kesheden beri bizge kóptegen jumys berýshiler habarlasty. Bul jerde jumys berýshiler tikeleı júzdesý arqyly izdegen mamandardy taba alsa, jumys izdeýshiler HR-menedjerlermen tanysyp, túıindemesin qaldyrady. Jármeńke jumyssyzdyqty azaıtý, belsendi eńbek naryǵyn qalyptastyrýdaǵy mańyzdy qadam», deıdi óńirlik kásipkerler palatasy salalyq damý bóliminiń basshysy Dınara Smaǵýlova.
Aqtóbe oblysy