Ken baılyǵy shekteýli bolǵan saıyn, ony utymdy ıgerý men ornyqty tolyqtyrýdyń mańyzy arta túsedi. Elimiz osy úderisti jańa modelder men zamanaýı quraldar arqyly basqarýǵa kiristi, dep jazady Egemen.kz.
Sońǵy jyldary memleket geologııalyq barlaý salasyn damytýda batyl qadamdar jasap, otandyq resýrstyq áleýetti arttyrý úshin ınvestısııalyq tartymdylyqty kúsheıtip keledi. Bul rette qabyldanyp jatqan birqatar strategııalyq bastamalar elimizdiń jer qoınaýyn paıdalanýdaǵy jańa paradıgmasyn aıqyndaıdy.
Aýstralııa úlgisi – ashyq ári básekeli ortaǵa jol
Qazaqstan batys-aýstralııalyq tájirıbeni negizge ala otyryp, «Kim birinshi kelse – soǵan artyqshylyq» qaǵıdatyn engizdi. Bul – geologııalyq barlaýǵa jeke kapıtaldyń kelýine jol ashqan, básekelestik pen ashyqtyqqa negizdelgen model. Jańa tásil – ınvestorlarǵa múmkindik, memleketke resýrstyq tolyqtyrý.
Aýqymdy barlaý – áleýetti keńistikti ıgerý
Memlekettiń jospary boıynsha 2026 jylǵa qaraı geologııalyq barlaý jumystary júrgiziletin aýmaq 1,9 mln-nan 2,2 mln sharshy shaqyrymǵa deıin ulǵaımaq. Bul tek keńistik emes – bul elimizdiń ıgerilmegen tabıǵı baılyǵy, bolashaq ındýstrııalyq jobalardyń irgetasy.
Sıfrlandyrý men halyqaralyq standart – senim kepili
Investordyń qyzyǵýshylyǵy eń aldymen derekke súıenedi. Osyǵan baılanysty Qazaqstan CRIRSCO halyqaralyq standartyn engizip, geologııalyq derekterdi sıfrlandyrýdy qolǵa aldy. Bul – árbir ınvestor úshin birdeı múmkindik, árbir ýchaske úshin ashyqtyq pen qoljetimdilik degen sóz. Geoderekterdiń ashyqtyǵy – kapıtaldyń senimin arttyrýdyń negizgi tetigi.
Salyqtyq yntalandyrý – kúrdeli ken oryndaryna demeý
Qabyldanǵan jańa sharalar aıasynda tabystylyqtyń ishki normasy (IRR) 15 paıyzdan tómen jobalar úshin paıdaly qazbalar óndirýge salynatyn salyqtan (NDPI) bes jylǵa deıin bosatý qarastyrylyp otyr. Bul – geologııalyq jaǵynan kúrdeli, biraq strategııalyq mańyzy zor ken oryndaryn ıgerýge serpin beretin mańyzdy sheshim.
Tehnogendik resýrstar – ekinshi tynys
Elimizde 55 mlrd tonnadan astam tehnogendik mıneraldyq túzilimderdiń (TMT) pasporty jasalyp jatyr. Bul – tek óndiristik qaldyq emes, qaıta óńdeýge bolatyn qýatty shıkizat kózi. Jańa tehnologııalar men ekologııalyq taza óndiris tásilderi arqyly bul qaldyqtar qaıta paıdaly ónimge aınalyp, ulttyq baılyqqa qyzmet ete alady.