20 maýsymda Atyraý oblysynyń ákimi Serik Shápkenov «Aqjaıyq» memlekettik tabıǵı rezervaty aýmaǵyndaǵy órt saldaryn joıýǵa arnalǵan jedel shtabtyń kóshpeli otyrysyn ótkizdi, dep habarlaıdy Egemen.kz.
Tilsiz jaý tolyqtaı oqshaýlandy, biraq torf qabattary men qamystardyń tútini sóndirilip jatyr.
Apat ornynda ashyq ot oshaqtary tirkelmegenimen, torf pen qamys qabattarynyń tútini tolyq sóngen joq. Qutqarýshylar táýlik boıy jumys isteýde. Qaıta tutanýdyń aldyn alý úshin órtengen aýmaqtar sý quıylyp, topyraqpen jabylyp jatyr.
Qutqarý jumystaryna 150-ge jýyq adam, 40 tehnıka jáne 2 tikushaq tartylǵan. Jıyn barysynda Tótenshe jaǵdaılar departamentiniń bastyǵy Nurlan Janabaev pen oblys ákiminiń orynbasary Qaırat Nurtaevtyń baıandamalary tyńdaldy.
Oblys ákimi órt oshaqtary tolyq joıylǵansha jumysty báseńdetpeýdi, jaǵdaıdy únemi baqylaýda ustaýdy jáne barlyq qyzmetterdiń úılesimdi jumys isteýin tapsyrdy.
Jasyryn oshaqtardy anyqtaý úshin jylý túsirilim jasaıtyn dron qoldanylýda
Tútin men ot oshaqtaryn dál anyqtaý maqsatynda jylý túsiretin teplovızorly dron paıdalanylyp jatyr. Bul qurylǵy jer astyndaǵy tleý oshaqtaryn anyqtaýǵa, negizgi qaýip aımaqtaryn belgileýge jáne kúshti dál baǵyttaýǵa múmkindik beredi.
О́rttiń shyǵý sebepteri tekserilip jatyr
Jıynda Serik Shápkenov órttiń shyǵý sebepterine qatysty túrli boljamdarǵa toqtalyp, arnaıy organdardyń barlyq nusqalardy tekserip jatqanyn málimdedi.
– Áleýmettik jelilerde túrli pikirler aıtylýda. Meniń tapsyrmammen bul jaǵdaı jan-jaqty zerttelip jatyr. Eger órt adamnyń áreketinen, ásirese ádeıi shyqqany anyqtalsa, kináliler zań aıasynda jaýapqa tartylady, – dedi ákim.
Tekserý barysy týraly halyq pen BAQ ókilderine qosymsha aqparat beriletini aıtyldy.
Júıeli sheshimder qabyldanady
Ákim órttiń uzaqqa sozylǵanyn aıtyp, bul jaǵdaıdyń qorshaǵan ortadaǵy júıeli problemalardy ashyp kórsetkenin jetkizdi.
– Kaspııdiń taıazdanýy men qamystyń shekten tys ósýi – bolashaqta óńir úshin úlken qaýip. Osyǵan baılanysty Tótenshe jaǵdaılar jáne Ekologııa mınıstrlikterimen birlesip, mundaı oqıǵalardyń aldyn alýǵa baǵyttalǵan keshendi jospar qabyldaımyz, – dedi Serik Shápkenov.
Alǵys pen qoldaý
Atyraý oblysynyń ákimi órtpen kúreske atsalysyp jatqan qyzmetkerlerge alǵys bildirip, olardyń jankeshti eńbegin erekshe atap ótti.
– Qurmetti jerlester, qıyn sátte sabyrlylyq tanytyp, túsinistikpen qaraǵandaryńyz úshin sizderge alǵys aıtamyn. Al tilsiz jaýmen kúresip jatqan mamandardyń qajyrly eńbegi – shynaıy kásibı erlik, – dedi oblys ákimi.