Qordaıdyń qońyr jeline kekilin taratyp ósken áıgili ǵalym Muhtarbaı О́telbaev týǵan jeri Tarazǵa keldi. Jáı kelgen joq, áıgili matematık, ǵalamdyq deńgeıdegi ǵalymnyń «Oılan, tap!» olımpıadasynyń qurmetti qonaǵy boldy. Bir sózben aıtqanda jergilikti bılik tórtkúl dúnıe tanyǵan ǵalymǵa qurmet kórsetti, dep habarlaıdy Egemen.kz.
«Meniń ǵalymdyǵym da, professorlyǵym da qazaqtyǵymnan sadaǵa. Aldymen qazaqpyn, musylmanmyn, sodan keıin ǵana ǵalymmyn» degen Muhtarbaı О́telbaevtyń taǵdyr taraýynda ótken ótkeli az emes. Ǵylymnan baqytyn tapqan ǵalymnyń orny – qashanda tór.
Respýblıkalyq deńgeıde uıymdastyrylǵan bilim básekesine elimizdiń ár qıyrynda oqıtyn, esepke júırik 7-8 synyptyń bilim alýshylary qatysty. Olardyń aldynda úlken bir synaq, túıip aıtqanda О́tkelbaev ótkeli turǵan edi...
Oqý-aǵartý mınıstrliginiń «Daryn» respýblıkalyq ǵylymı-praktıkalyq ortalyǵy jáne Jambyl oblysy ákimdigine qarasty bilim basqarmasynyń birlese uıymdastyrýymen ótken is-shara kóptiń kóńilinen shyqty. Ataǵy alysqa taraǵan tulǵalardy kózi ketken soń dáriptep jatatyndar az emes. Osy joly jergilikti bılik qazaqtyń atyn álemge tanytqan ǵalymǵa tirisinde qurmet kórsetti.
«The Ulytau Educational Foundation» qoǵamdyq qorynyń demeýshiligimen ótken olımpıadaǵa elimizdiń barlyq óńirinen 150 oqýshy qatysyp, zııatkerlik dodada baq synady. Uıymdastyrýshylardyń aıtýynsha, bilim básekesi oqýshylardyń teorııalyq bilimin praktıkalyq daǵdymen ushtastyrý maqsatynda qolǵa alynǵan.
Is-sharanyń ashylý saltanatyna Eńbek Eri Muhtarbaı О́telbaev, onyń shákirtteri fızıka-matematıka ǵylymdarynyń doktorlary Baqytbek Qoshanov, Aqtaı Birgebaev, «Daryn» respýblıkalyq ǵylymı-praktıkalyq ortalyǵynyń ádiskeri Záýre Amanova, oblys ákimdigi bilim basqarmasynyń basshysy Nurbek Orshybekov, Sherhan Murtaza atyndaǵy halyqaralyq ýnıversıtetiniń rektory, pedagogıka ǵylymdarynyń doktory Mahmetǵalı Sarybekov qatysyp, zerek oqýshylarǵa bilim básekesinde sáttilik tiledi. Is-sharanyń basy-qasynan tabylǵan áriptesimiz, «Egemen Qazaqstan» basylymynyń ardageri, qalamger Súleımen Mámet te jyly lebizin bildirdi.
«Baqytty bolashaq» oqýshylar saraıynda alǵash ret ótken olımpıada birneshe kúnge sozyldy. 150 oqýshy, 50-ge jýyq komanda jetekshileri qatysqan bilim básekesi tartysqa toly boldy. Janarynda ot oınaǵan oqýshylardyń júzinen keıde qobaljýdyń taby da baıqalyp turdy. Olardyń bári de ǵalamdyq deńgeıdegi ǵalym atyndaǵy dodada top jarýdy kózdep kelgeni anyq.
Tuńǵysh ret Taraz tórinde ótken Olımpıadanyń jabylý saltanatynda júzden júırik shyqqan jas talanttar marapattaldy. Qazylar alqasy qazaqtyń áıgili aqyny Tólegen Aıbergenovtyń «Báıge berem jyǵylǵan balýanǵa da, adaldyǵy sezilip turar bolsa» degen óleń joldaryn basty ustanymǵa aınaldyrǵandaı kórindi. Olımpıada qorytyndysynda 14 oqýshy arnaıy gramotalarmen marapattalǵany sózimizdi dáleldeı tússe kerek. Árıne, zerek oqýshylardy qanattandyrý úshin jasalǵan qadam dep paıymdadyq.
«Oılan, tap!» resbýblıkalyq Olımpıadasynyń qorytyndysynda 31 oqýshy júldeli úshinshi orynǵa laıyq dep tanyldy. Olardyń barlyǵyna III dárejeli dıplom jáne arnaıy medal men portatıvti proektorlar tabystaldy. Sondaı-aq 20 oqýshy júldeli ekinshi oryn bıiginen kórindi. Kúmis júldege qol jetkizgen 20 saıypqyranǵa «AirPods» symsyz qulaqqaby úlestirildi. Qatarynan oza shaýyp úzdik nátıje kórsetken 13 bilim alýshy birinshi oryn ıegeri atandy. Olarǵa uıymdastyrýshylar «Apple Watch» smart saǵatyn tabystady. Sonymen qatar almatylyq Dinmuhamed Saýrbaev, Abzal Kúnǵojın respýblıkalyq olımpıadanyń absolıýtti chempıony atanǵanyn aıta ketken jón. Qazylar alqasynyń sheshimimen Aqtóbe óńirinen kelgen oqýshylardan jasaqtalǵan quram úzdik komana atandy.
«Kózi ketkennen keıin talaı myqtylarǵa qurmet kórsetilip jatady. Ony bárimiz kórip júrmiz. Al Tarazda ótken bul Olımpıada álemge áıgili ǵalymǵa kóziniń tirisinde qurmet kórsetilýimen daralandy desek bolady. О́tken jyly mundaı baıqaýdy Qapshaǵaıda uıymdastyrdyq. Joǵary deńgeıde ótti.
Osy jyly ǵalymnyń týǵan jerinde ótýine muryndyq bolǵan Oqý-aǵartý mınıstri Ǵanı Beısembaev pen Jambyl oblysynyń ákimine zor rızashylyǵymdy bildiremin. Erbol Shyraqpaıulynyń bul olımpıadany qoldaǵany kóńil qýantty. Ǵalymdy jeke qabyldaǵany da kóńilimizge qondy. Ákimniń bul izgi qadamy ózgelerge úlgi bolsa deımiz.
Muhtarbaı О́telbaev halyqaralyq deńgeıde moıyndalǵan tulǵa ekenine eshkimniń talasy joq. Endi osy olımpıadanyń aıasyn keńeıtý jaǵyn qarastyrǵan joq. Respýblıkalyq deńgeıde ótkizilgen is-sharany halyqaralyq deńgeıde uıymdastyrýǵa da múmkindik bar. Tek bılik basyndaǵy azamattar qulyqty bolsa eken», deıdi ardager qalamger Súleımen Mámet.
Úsh kúnge sozylǵan bilim básekesinde baq synaǵan bilim alýshylar tek Olımpıadaǵa qatysyp qana qoıǵan joq. Olar tarıhy myńjyldyqtarmen sabaqtasyp jatqan Jambyl óńiriniń tarıhı jerlerin aralap, tanym kókjıegin keńeıtti. Uıymdastyrýshy taraptyń uıytqy bolýymen oqýshylar Aısha bıbi, Qarahan kesenelerine baryp, zııarat etti. Sondaı-aq Tekturmas etno tarıhı keshenine, «Kóne Taraz» etnomádenı keshenine at basyn burdy. Oblys ortalyǵyndaǵy mýzeılerge de baryp, tarıhy tereńde jatqan jádigerlermen tanysty.
Áýlıeatada ótken bilim básekesin qonaqtar da joǵary baǵalap jatty. Ǵylymǵa ańsary aýǵan bilim alýshylardy baptap júrgen jetekshiler bul baıqaý dástúrli túrde uıymdastyrylsa degen tilegin aıtty. Laıym, solaı bolsyn. Respýblıkalyq dodada О́tkelbaev ótkelinen ótken saıypqyrandar áli talaı bıikti baǵyndyrady degen senim zor.
Jambyl oblysy