L.N. Gýmılev atyndaǵy Eýrazııa ulttyq ýnıversıteti Buqaralyq aqparat quraldary qyzmetkerleriniń kúni qarsańynda Alash ardaqtysy Aqseleý Seıdimbekti eske alýǵa arnalǵan dástúrli XIV bılıard týrnırin ótkizdi.Uıymdastyrylǵan is-sharanyń deńgeıi men aýqymy artyp keldi.Bıyl 14-shi márte ótken týrnırge qyryqtan asa BAQ ókilderi men zııaly qaýym qatysty, dep jazady Egemen.kz.
Aqparat salasynyń maıtalmandary joǵary deńgeıde oıyn órnegin kórsetip, merekeni áserli atap ótti. Elge esimi eleýli el aǵalary – kórnekti jazýshylar Qoıshyǵara Salǵarauly men Tólen Ábdik, Aqseleý aǵanyń rýhanı inileri- mınıstr Ǵanı Beısembaev pen Senator Nurtóre Júsip bastaǵan zııaly qaýym ókilderi tuǵyrly tulǵa týraly estelikterimen bólisti.
«Búgin men dál osy jerge mınıstr retinde emes, Aqseleý Slanuly Seıdimbektiń shákirti ári rýhanı inisi retinde kelip otyrmyn.Osydan bes jyl buryn osy jarysqa kelgende kórnekti aqynymyz Nesipbek Aıtuly qolyna kıı ustap, tastaıaq oınap júr edi. Kórgen boıda qushaǵyna alyp, «Ǵanı, aınalaıyn, aman bol.Kórgenime qýanyshtymyn!» degeni áli kúnge esimde. Ol kisi de ómirden ótip ketti, qazir Aqseleý ustazymmen birge sol aǵamyzdy da eske alyp otyrmyn.
Biz jaqsylarymyzdy osylaı eske alyp, izdep júretin bolsaq, ol da ata-babalardan qalǵan ulttyń úlken bir qundylyǵy dep bilemin.Sondyqtan ómirden ótken aǵalarymyzdy izdep júrgenge ne jetsin?! Men de búgin Aqseleý aǵamdy izdep kelip otyrmyn, ózi ómirden ótse de osyndaı sharanyń jalǵasyn taýyp jatqany qýantady.Aǵamen alǵash tanysqanda men 27-28 jasta bolatynmyn.Basymdy sıpap, kókirekten qaqpady, qaıta aǵalarymyzdyń keremet qasıeti eshqandaı ataǵy joq, bıikke jetpegen jastardy qasyna ertip alyp júre beretin. Sol rýhtandyrý osyndaı dárejege jetýime úles qosqan shyǵar dep oılaımyn.Men de sol aǵalar sııaqty jastardyń mańdaıynan súıip, arqasynan qaqqym kelip turady.Bul aǵadan kórgen tálim men taǵylym der edim.
Sondaı-aq kúni keshe ǵana Eýrazııa ulttyq ýnıversıtetiniń rektory Erlan Báttashulymen aqyldasyp, oqý-aǵartý mınıstrligimen birlese otyryp, osy bıyl Aqańnyń artynda qaldyrǵan muralaryn zerttep-zerdeleýge baılanysty jumystardy bastap kettik. Aqańnyń ánderi men shyǵarmalary, jýrnalıstıkadaǵy eńbekterine ǵylymı zertteý jumystaryn júrgizip, respýblıkalyq baıqaý-konkýrstar ótkizýdi josparlap otyrmyz.Rýhy shat bolsyn, aǵamyzdyń»,-dep túıdi sózin mınıstr.
Nurtóre Júsip QR Parlamenti Senatynyń depýtaty:
- «Ǵalymnyń haty ólmeıdi, jaqsynyń aty ólmeıdi» degen qazaqta maqal bar, sony aıǵaqtaıtyn týrnırge aınaldy. Bul jýrnalısterdiń oı-pikir alańyna, bas qosyp, eldiń erteńine qatysty, búginine qatysty máselelerdi talqylaýǵa, oınaı júrip oılasýǵa arnalǵan jaqsy bir týrnır dep aıtýǵa bolady.
Qaırat Saq, EUÝ Jýrnalıstıka máselelerin zertteý ınstıtýtynyń dırektory:
- Bıylǵy erekshelik jastar men aqsaqaldarymyz birigip, bir stoldyń basynda áńgimelerin aıtyp júrip oınasyn dep, bólmeı-jarmaı bir topqa biriktirip ótkizdik týrnırdi. Tek qana aqsaqaldarymyzda renish bolmaýy úshin ol kisilerge jeńildik jasadyq. 40 jasqa deıingiler 40-60 jastaǵylarǵa bir shar, al 60 jastan asqandarǵa 2 shar jeńildik beredi dep sheshtik.
Bul dástúrli týrnır jýrnalıster arasynda keń tanylǵan. Týrnırdiń áńgimesi, ónegesi jyl boıy aıtylyp, keń taralaryna esh kúmánimiz joq.
Sonymen, jýrnalıstıka jolbasshylary, qalamgerler, medıa-menedjerler men jas jýrnalıster jarys kórigin qyzdyrdy. Týrnır qorytyndysynda belgili aıtysker aqyn, ALJIR murajaıynyń dırektory Dáýletkereı Kápuly I oryndy, jýrnalıst, Batys Qazaqstan oblysy ákimdiginiń apparat basshysy Nurdilda Oraz II oryndy, al III oryndy aqyn Ularbek Nurǵalymuly ıelendi.
Týrnır uıymdastyrýshylar bıyl belgili qalamgerler atyndaǵy júldeler taǵaıyndady. Oralhan Bókeı atyndaǵy júlde Sádibek Túgelge; Káribaı Ahmetbekov atyndaǵy júlde Kárimbek Qurmanalıevke; Aqseleý Seıdimbek atyndaǵy júlde Nurtóre Júsipke; Serik Ábdiraıymuly atyndaǵy júlde Darhan Myńbaıǵa; Qýanyshbaı Qurmanǵalıev atyndaǵy júlde Qoıshybaı Esentaevqa berildi.
Odan bólek «Eń syıly bılıardshy» júldesin Qoıshyǵara Salǵarauly, «Eń mádenıetti bılıardshy» júldesin Tólen Ábdik, «Eń sheber bılıardshy» júldesin Altynbek Nuquly, «Eń mergen bılıardshy» júldesin Álimjan Sabyrjanuly, «Eń shapshań bılıardshy» júldesin Sharhan Qazyǵulov, «Tehnıkasy myqty tastaıaqshy» júldesin Marat Manasbaev, «Eshkimniń kóńilin jyqpaǵan bılıardshy» júldesin Qaırat Musaqulov aldy.
Jalpy, is-sharaǵa qatysýshylar tek shar qýalap qana qoımaı, oıly sózder tarqatylǵan, ulttyq qundylyqtar ulyqtalǵan, taǵylymǵa toly týrnırdi joǵary deńgeıde uıymdastyrǵan Eýrazııa ulttyq ýnıversıtetiniń rektory Erlan Sydyqovqa, Jýrnalıstıka fakýltetiniń dekany Nurjan Qýantaev pen alashtanýshy ǵalym, EUÝ Jýrnalıstıka máselelerin zertteý ınstıtýtynyń dırektory Qaırat Saqqa jáne qarjylaı qoldaý kórsetken EUÝ Kásipodaq komıtetiniń tóraǵasy Bákejan Seıdesheke, memleket jáne qoǵam qaıratkeri, ǵalym, zań ǵylymdarynyń doktory, professor Baqytjan Ábdiraıymǵa, Aqseleý aǵanyń inisi Asylhan men uly Ernarǵa alǵystaryn aıtyp tarqasty.