Qazaqstanda áıelder men balalardy zorlyq-zombylyqtan qorǵaý – memlekettik saıasattyń basym baǵyttarynyń biri. Bul týraly Memleket basshysy búgin quqyq qorǵaý organdarynyń keńeıtilgen alqa májilisi otyrysyndaǵy sóılegen sózinde aıtty, dep habarlaıdy Egemen.kz.
«Kelesi mańyzdy mindettiń biri – otbasylyq zorlyq-zombylyqpen kúres jáne áıelder men balalardy qorǵaý. Osy baǵytta zańnamalyq, ınstıtýsıonaldyq turǵydan batyl qadamdar jasalýda. Otbasylyq zorlyq-zombylyq jasaǵany úshin beriletin jaza edáýir kúsheıtildi. Bir jyl buryn tıisti zań qabyldandy. Zańǵa engizilgen túzetýler men basqa da sharalar naqty nátıje bere bastady. Ortasha jáne aýyr deńgeıdegi otbasylyq-turmystyq qylmys sany jyl basynan beri 30 paıyzǵa tómendedi», deıdi Prezıdent.
Memleket basshysy sońǵy 5 jylda áıelderge qatysty quqyq buzýshylyqtar eki esege azaıǵanyn aıtty.
«Eń bastysy, qazir qoǵamdyq sana túbegeıli ózgerip jatyr. Azamattarymyzdyń boıynda otbasyndaǵy qatigezdik pen ozbyrlyqqa múldem tózbeýshilik qasıeti qalyptasýda», dep atap ótti.
Prezıdenttiń aıtýynsha, zardap shekkenderge qol ushyn beretin, al quqyq buzýshylardy jazǵyratyn qaıyrymdy qoǵam ornyǵyp keledi. Sondaı-aq elimizde «Qazaqstan balalary» atty arnaıy baǵdarlama ázirlenip jatyr. Qujatta óskeleń urpaqtyń múddesin qorǵaýǵa arnalǵan mańyzdy tetikter usynylady.