Memleket basshysy Qasym-Jomart Toqaev quqyq qorǵaý organdarynyń keńeıtilgen alqa májilisin ótkizdi. Onda Prezıdent qyzmet babynda qaza tapqan polıseılerdiń erligin el esinde qaldyrý úshin olardyń esimin mekemelik nagradalar men quqyq qorǵaý mekemelerine, kóshe ataýlaryna berý máselesin usyndy, dep jazady Egemen.kz.
Ol mundaı tájirıbe burynnan bar ekenin mysalmen jetkizdi.
«Lańkesti ustaý kezinde erlikpen qaza tapqan Halyq qaharmany Ǵazız Baıtasovtyń esimi Tarazdaǵy ortalyq kóshelerdiń birine berildi. Sondaı-aq qaladaǵy oqý-jattyǵý polıgony da batyrdyń atymen atalǵan. Taıaýda onyń ómiri men erligi týraly «Kapıtan Baıtasov» atty kórkem fılm kórermen nazaryna usynylmaq», dedi Qasym-Jomart Toqaev.
Prezıdent órt sóndirý kezinde qaza tapqan Asqar Zabıkýlınniń de el esinde ekenin aıtyp ótti.
«Astanadaǵy О́rt sóndirý bólimine jáne sol bólim ornalasqan kóshege onyń esimi berildi. Bul azamattardy naǵyz beıbit kúnniń batyrlary deýge bolady. Olar aqtyq demi qalǵansha antqa adal boldy, qyzmettik paryzyn óteý jolynda óz ómirlerin qurban etti», dedi Memleket basshysy.
Prezıdenttiń aıtýynsha, zań men memleketke adal qyzmet etý adamgershilik pen ádiletke negizdelgen qundylyqtardan bastalady. Bul, eń aldymen, otbasy tárbıesine baılanysty. Osyǵan oraı, Prezıdent birneshe býyn boıy quqyq qorǵaý qyzmetinde júrgen Zaınýlınder áýletin marapattady.
Memleket basshysy qoǵamdaǵy zań men tártip – tek resmı qurylymdarǵa ǵana emes, barsha azamatqa ortaq jaýapkershilik ekenin jetkizdi.
«Jalpy, zań men tártip uǵymy kóshedegi tazalyq pen qaýipsizdik sııaqty qarapaıym nárseden bastalady. Jergilikti bılik, bıznes jáne qoǵam belsendileri ortaq múdde jolynda kúsh biriktirip jumys istese, qoǵamdaǵy zań men tártip te nyǵaıa túsedi», dedi Prezıdent.
Sondaı-aq Aqmola oblysynda júzege asyp jatqan «Zııaly qaýym» jobasyna erekshe toqtalyp, aýyl aqsaqaldary men turǵyndarynyń quqyq qorǵaý qyzmetine kórsetip otyrǵan qoldaýyn oń baǵalady.
«Sondaı-aq búgin men bes jylda birde-bir qylmys tirkelmegen birqatar aýyldyń aqsaqaldaryn marapattaımyn. Quqyq qorǵaý organdarynyń kóp jumysy syrt kózge kórine bermeıdi. Jedel qyzmetkerler, tergeýshiler, prokýrorlar, krımınalıster, patrýl qyzmetkerleri, ýchaskelik ınspektorlar men basqa da qurylym qyzmetkerleri kún saıyn el tynyshtyǵyn qas qaqpaı kúzetip jatyr. Eshqandaı qaýip-qaterge qaramastan, Otan úshin jasap jatqan adal qyzmetterińizge zor rızashylyǵymdy bildiremin. Men Sizderge senemin! Árqaısysyńyz myqty maman, otanshyl ári adal azamat degen atqa laıyqsyzdar», dedi Qasym-Jomart Toqaev.
Sonymen qatar Prezıdent quqyq qorǵaý salasyndaǵy júıeli taldaýdyń mańyzdylyǵyn atap ótti.
«Árıne, quqyq qorǵaý mekemeleriniń jumysynda eshqandaı qatelik nemese jetispeýshilik joq dep aıtýǵa bolmaıdy. Biraq qara bultty tóndirýdiń de qajeti joq. Bárimiz bir el, bir halyq bolyp Qazaqstanymyz úshin qyzmet etip, tabandy jumys isteýimiz kerek. Bul – barshamyzǵa ortaq ulttyq paryz, azamattyq borysh. Qazaqstan qaýipsiz, zań men tártipke baǵynatyn el bolýy kerek».
Memleket basshysynyń tapsyrmasyna sáıkes, bir apta ishinde Prezıdent Ákimshiligi men Qaýipsizdik Keńesi quqyq qorǵaý organdarynyń qyzmetine qatysty arnaıy taldaý ázirlenedi. Bul qujatta salanyń barlyq ózekti máseleleri ashyq kórsetilip, olardy sheshýdiń naqty joldary usynylýy tıis. Prezıdent bul – asa mańyzdy jumys ekenin jáne ony júıeli túrde jalǵastyrý qajettigin erekshe atap ótti. Onyń aıtýynsha, elimizdiń basty baǵdary – zań men tártip qaǵıdatyna negizdelýi kerek.