Senat spıkeri Máýlen Áshimbaevtyń tóraǵalyǵymen palata otyrysy ótip, onda depýtattar mańyzdy zańdar toptamasyn qarady.
Senatorlar aldymen jańa Salyq kodeksin jáne oǵan ilespe «Qazaqstan Respýblıkasynyń keıbir zańnamalyq aktilerine salyq salý máseleleri boıynsha ózgerister men tolyqtyrýlar engizý týraly» zań jobasyn qarap, talqylady. Bul zańdar Memleket basshysy Qazaqstan halqyna Joldaýynda belgilep bergen mindetterdi iske asyrý maqsatymen ázirlengen jáne qolaıly bıznes-orta men ınvestısııalyq ahýal qalyptastyrýǵa baǵyttalǵan. Olar salyq tóleýshilerge el aýmaǵyndaǵy ekonomıkalyq qyzmetti júrgizý jaǵdaılarynyń turaqtylyǵy men aıqyndylyǵyna negizdelgen óz qyzmetin anyqtaýǵa múmkindik beredi.
«Prezıdent Qasym-Jomart Toqaev el ekonomıkasynyń damýyna únemi basa mán berip keledi. Ekonomıkanyń turaqty ósýi salyq saıasatynyń tıimdiligine tikeleı baılanysty ekeni anyq. Osyǵan oraı Memleket basshysynyń Joldaýda bergen tapsyrmasyn iske asyrý úshin fıskaldy retteý isin qaıta jańǵyrtýdy kózdeıtin jańa Salyq kodeksi ázirlendi. Kodekstiń maqsaty – salyq júıesiniń ádil, tıimdi jáne jańa ekonomıkalyq damý talaptaryna saı bolýyn qamtamasyz etý. Osy rette qujatta ekonomıkanyń túrli salasynda dıfferensıaldy salyq mólsherlemesi qarastyrylyp otyr. Atap aıtqanda, aýyl sharýashylyǵy óndirýshilerine, áleýmettik jáne qoǵamdyq mańyzy bar jekelegen salalarda jeńildetilgen mólsherleme belgilendi. Sondaı-aq dıfferensıaldy korporatıvtik jáne jeke tabys salyqtary engizildi. Budan bylaı asa qymbat múlik ıelerine de «sán-saltanatqa salyq» salynatynyn atap ótken jón», dedi spıker.
Sonymen qatar M.Áshimbaev jańa Salyq kodeksiniń taǵy bir basymdyǵy salyq tóleýshilermen qarym-qatynastardyń servıstik modeline kóshý ekenin aıtty. Investorlardy yntalandyrýdyń qosymsha sharalary jáne tabıǵı resýrstarǵa salyq salý tıimdiligin arttyrý boıynsha jańa normalar kózdelgen. Qujatta arnaıy salyq rejimderi men salyqtyq jeńildikter de ońtaılandyrylǵan.
Senatorlar zańdarda qarastyrylǵan normalardy konseptýaldy turǵydan qoldap, kodekske birqatar túzetý engizýdi usyndy.
«Palata jańa Salyq kodeksin qaraý barysynda onyń jekelegen erejelerin memlekettiń, shaǵyn jáne orta bıznestiń, sondaı-aq qoǵamnyń múddesin eskere otyryp, qaıta qaraýdy usyndy. Sol arqyly áleýmettik mańyzy bar azyq-túlik taýarlaryn óndirýshilerdi, shaǵyn jáne orta kásipkerlik, qor naryǵy sýbektilerin jáne ekonomıkanyń basqa da salalaryn qoldaý kózdelgen. Aldaǵy ýaqytta bul qaralǵan jańa Salyq kodeksi Prezıdenttiń bastamasymen júrgizilip jatqan reformalardy tabysty iske asyrýǵa, ulttyq ekonomıkany serpindi jáne turaqty damytýǵa oń septigin tıgizedi dep senemiz», dedi M.Áshimbaev.
Talqylaý nátıjesinde Senat jekelegen baptardyń jańa redaksııasyn eskere otyryp, Salyq kodeksin jáne oǵan ilespe «Qazaqstan Respýblıkasynyń keıbir zańnamalyq aktilerine salyq salý máseleleri boıynsha ózgerister men tolyqtyrýlar engizý týraly» zańdy Májiliske qaıtardy.
Depýtattar eki oqylymda qarap, maquldaǵan kelesi zań turǵyn úı qatynastary jáne turǵyn úı-kommýnaldyq sharýashylyq salasyndaǵy zańnamany jetildirýdi kózdeıdi. Atap aıtqanda, «Qazaqstan Respýblıkasynyń keıbir zańnamalyq aktilerine turǵyn úı-kommýnaldyq sharýashylyq, kásipkerlik jáne eksporttyq-kredıttik agenttiktiń qyzmeti máseleleri boıynsha ózgerister men tolyqtyrýlar engizý týraly» zań ashyqtyqty arttyrýǵa jáne kóppáterli turǵyn úılerdi basqarý júıesin jetildirýge arnalǵan. Sondaı-aq kondomınıým obektisin basqarýdyń eki nysanyn engizý, turǵyn úı ınspeksııasynyń quzyretterin keńeıtý jáne jylytý maýsymyna ınjenerlik jeliler men jabdyqtardy, múmkindigi shekteýli adamdar úshin lıftiler men kótergishterdi, órtke qarsy júıelerdi baqylaýdy qamtamasyz etý máselelerine basa mán berildi.
Palata otyrysynda «Salyq jáne bıýdjetke tólenetin basqa da mindetti tólemder týraly» Qazaqstan Respýblıkasynyń Kodeksine (Salyq kodeksi) jáne ony qoldanysqa engizý máseleleri boıynsha Qazaqstan Respýblıkasynyń zańdaryna ózgerister men tolyqtyrýlar engizý týraly» zań da qaraldy. Senatorlar qujatty jekelegen baptarǵa qatysty usynystardyń jańa redaksııasymen Májiliske qaıtardy. Engizilgen túzetýlerdiń negizgi maqsaty salyq saıasatyn jáne salyq salýdyń jekelegen tetikterin jetildirý, sondaı-aq jeke tulǵalardyń tabystary men múlikterin jalpyǵa birdeı deklarasııalaý júıesin ońtaılandyrý ekenin aıta ketken abzal.
Senat depýtattary kún tártibine shyǵarylǵan «Qazaqstan Respýblıkasynyń Ákimshilik quqyq buzýshylyq týraly kodeksine turǵyn úı-kommýnaldyq sharýashylyq máseleleri boıynsha ózgerister men tolyqtyrýlar engizý týraly» zańdy da qarap, maquldady. Zańdaǵy mańyzdy túzetýdiń biri – kóppáterli úı múlkiniń menshik ıeleri birlestiginiń tóraǵasy men kondomınıým obektisin basqarý sýbektisi úshin kondomınıým obektisin basqarý jónindegi aı saıynǵy jáne jyldyq esepterdi usyný merzimderin buzǵany úshin jeke jaýaptylyq engizý boldy. Budan basqa, aıyppuldar úıdi basqarýdy júzege asyratyn jeke nemese zańdy tulǵaǵa qoldanylady degen eskertpe kózdelgen.