Jaqynda Almatyda Disney men Pixar stýdııalarynyń «Elıo» atty jańa fılminiń qazaq tilindegi tusaýkeser kórsetilimi ótti. Fılmderdi túrli elderge beıimdep, dýblıajdaý – Disney kompanııasynda burynnan qalyptasqan úrdis. Disney jyl saıyn ár fılmniń túrli tilderdegi 40-ǵa jýyq nusqasyn daıyndaıdy, dep habarlaıdy Egemen.kz.
Fılm kórermendi erekshe tylsym álemge jeteleıdi. Basty keıipker – qııaly ushqyr Elıo. Ol kezdeısoq Jerdiń ókili retinde búkil ǵalamnyń tirshilik ıeleri jınalǵan planetarlyq uıymǵa tap bolady. Endi ol adamzat atynan sóıleıtin jalǵyz ókil. Elıo búkil galaktıkaǵa qaýip tóndirip turǵan daǵdarysty qalaı rettemek? Mine, usynylyp otyrǵan ǵylymı-fantastıkalyq fılm ǵaryshtaǵy qyzyqty oqıǵalardy shym-shytyryq epızodtarmen tarqatyp, kishkentaı kórermenniń qııalyn bıikke erkin samǵatady. Bul tek shytyrman oqıǵa emes, ár balaǵa ózin taný men damý jolyn kórsetetin nusqaýlyq deýge de bolady.
Osy bastama aıasynda Disney stýdııasy 2024 jyly «Oıjumbaq 2», «Moana 2», «Mýfasa. Arystan patsha», bıyl «Aqshaqar», «Lılo men Stıch» dep atalatyn fılmderin qazaq tiline aýdaryp, dýblıaj jumysyn qarjylandyrdy. Qazaq tiliniń iri halyqaralyq stýdııalar óz qarajatymen qoldaıtyn tilderdiń qataryna qosylýy – tilimizdiń damýy úshin óte mańyzdy oqıǵa. Kórermenge jol tartqan «Elıo» týyndysy da osy halyqaralyq ıgi bastamanyń tizbekti bir taraýy.
Kórsetilimge elimizge tanymal tulǵalar, qoǵam qaıratkerleri, kásipkerler men depýtattar, dýblıaj akterlary men blogerler, BAQ ókilderi qatysty.
Almaty