Jańaqorǵan aýdanynda mekteptiń bas esepshisi bolǵan Abzal Seıdekovke qatysty qylmystyq is boıynsha sot úkimi shyqty. Ol qyzmet babyn paıdalanyp, memlekettik mekeme qarjysyn jymqyrǵany úshin kináli dep tanyldy, dep habarlaıdy Egemen.kz.
Qyzylorda oblysy boıynsha ekonomıkalyq tergep-tekserý departamenti qyzmetkerleriniń tergeýi barysynda A.Seıdekov 2023 jyldyń 1 qańtarynan 2024 jyldyń 31 jeltoqsanyna deıingi aralyqta ózine senip tapsyrylǵan laýazymdyq mindetterin teris paıdalanyp, mektep qyzmetkerleriniń aılyq jalaqysyn esepteý kezinde únemdelgen qarajatty óz shotyna zańsyz aýdaryp otyrǵandyǵy anyqtaldy. Ol jalpy somasy 36 mıllıon teńge kóleminde qarajatty jymqyryp, ony «Pin Up» býkmekerlik qosymshasy arqyly qumar oıyndaryna jumsaǵan.
Alaıda tergeý barysynda keltirilgen zalal tolyǵymen óteldi. Otyz alty mıllıon teńge bıýdjetke qaıtaryldy.
Sot A.Seıdekovti Qazaqstan Respýblıkasynyń Qylmystyq kodeksiniń 189-baby 4-bóligi 2-tarmaǵy boıynsha (senip tapsyrylǵan bóten múlikti ıemdenip alý nemese ysyrap etý, asa iri mólsherde) kináli dep tanyp, 7 (jeti) jylǵa bas bostandyǵynan aıyrý jazasyn taǵaıyndady. Sonymen qatar, esepshilik qyzmetpen aınalysý quqyǵynan 7 jyl merzimge aıyryldy.
Sottalýshy jazasyn qylmystyq-atqarý júıesiniń ortasha qaýipsiz mekemesinde óteıtin bolady.