24–29 maýsym aralyǵynda Soltústik Makedonııanyń Strýga qalasynda 16 jasqa deıingi jasóspirimder arasynda Balqan matematıka olımpıadasy (JBMO) ótedi. Atalǵan dodaǵa 20-dan astam eldiń ókilderi qatysady, olardyń qatarynda Qazaqstannan barǵan ulttyq qurama da bar, dep habarlaıdy Egemen.kz.
Bıyl elimizdiń atynan halyqaralyq jáne respýblıkalyq jarystardyń jeńimpazdarynan jasaqtalǵan 6 oqýshy qatysady. Olar:
Nurtaı Málik (9-synyp, «Bilim-ınnovasııa» lıseıi, Aqtóbe); Anýar Aǵybaev (9-synyp, Nurorda, Almaty); Aleksandr Oleınıkov (9-synyp, Nurorda, Almaty); Jáńgir Býlat (8-synyp, RFMSh, Almaty); Batyrhan Beıganov (9-synyp, RFMSh, Almaty); Mıras Kenesbek (9-synyp, «Bilim-ınnovasııa», Qaraǵandy).Qurama jetekshileri – Sergeı Polıanskıh pen Perızat Saýtbekova.
«Qazaqstan geografııalyq turǵydan Balqan elderine kirmegenimen, 2004 jyldan beri JBMO-ǵa turaqty túrde qonaq el retinde qatysyp keledi. Bul eldiń matematıka salasyndaǵy daryndy oqýshylaryn halyqaralyq deńgeıde tanytýǵa úlken múmkindik beredi», dep habarlady Oqý-aǵartý mınıstrliginiń baspasóz qyzmeti.
Aıta keteıik, ótken jyly Túrkııanyń Antalıa qalasynda ótken olımpıadada qazaqstandyq komanda 6 júlde, atap aıtsaq, 2 altyn, 3 kúmis jáne 1 qola medal enshilegen bolatyn.