2025 jylǵy 24 maýsymda «Zań men tártip» tujyrymdamasy sheńberinde QR Sybaılas jemqorlyqqa qarsy is-qımyl agenttiginiń jáne IýNESKO qamqorlyǵyndaǵy Mádenıetterdi jaqyndastyrý ortalyǵynyń qoldaýymen «Ádil qoǵam» jobasy resmı túrde iske qosylyp, jurtshylyqqa tanystyryldy, dep habarlaıdy Egemen.kz.
Joba mádenı jáne bilim berý baǵdarlamalary arqyly sybaılas jemqorlyqqa qarsy mádenıetti qalyptastyrýǵa jáne nyǵaıtýǵa baǵyttalǵan.
QR Ulttyq akademııalyq kitaphanasynda ótken is-sharaǵa Mádenıet jáne aqparat mınıstri Aıda Balaeva, Sybaılas jemqorlyqqa qarsy is-qımyl agenttiginiń tóraǵasy Ashat Jumaǵalı, Parlament depýtattary, memlekettik organdar men uıymdardyń basshylary, memleket jáne qoǵam qaıratkerleri, eldiń ǵylymı jáne shyǵarmashylyq zııaly qaýym ókilderi qatysty.
QR Mádenıet jáne aqparat mınıstri Aıda Balaeva óz sózinde «Ádil qoǵam» jobasynyń adaldyq pen ádilettilik jolyndaǵy naqty qadamdardyń biri ekenin atap ótti.
«Keshe ǵana Memleket basshysy quqyq qorǵaý organdarynyń keńeıtilgen alqa otyrysynda elge jáne zańǵa qyzmet etýge bel býǵan árbir azamat adamgershilik pen ádildik qundylyqtaryn basshylyqqa alatynyn aıtyp, mundaı qasıetter eń aldymen tárbıe arqyly beriletinin atap ótken bolatyn. Sondyqtan biz ár azamattyń boıyna adaldyqty darytý, jastardy parasat pen izgilikke baýlý jolynda birlese jumys isteýge tıispiz. Tek osylaı ǵana biz turaqty, senimdi, adamgershilikke negizdelgen qoǵamdy birge qalyptastyra alamyz», dedi Aıda Balaeva.
QR Sybaılas jemqorlyqqa qarsy is-qımyl agenttiginiń tóraǵasy Ashat Jumaǵalı qazaq halqynyń ulttyq dástúrleri ejelden-aq ádildik, adaldyq jáne parasattylyq qundylyqtaryn qalyptastyrǵanyn atap ótti.
«Bul ıdealdar urpaqtan urpaqqa berilip, ańyzdardan, maqaldardan, óleńder men ádet-ǵuryptardan kórinis tapty. Rýhanı muraǵa baı ulttyq mádenıet halyq arasynda adamgershilik normalar men qaǵıdattardy qurmetteýdi tárbıeleýge negiz boldy. Osylaısha, ulttyq murany, otbasylyq jáne qaýymdyq dástúrlerdi qurmetteý arqyly sybaılas jemqorlyqqa qarsy qundylyqtardy qura otyryp, biz adal qoǵamdy qalyptastyrý úshin berik irgetas qalaımyz», dedi Ashat Jumaǵalıuly.
Is-shara aıasynda qatysýshylarǵa halyq danalyǵy men adaldyq úlgisin kórsetetin «Izgilik dástúri» atty beınerolıkter, oqýshylardyń taqyryp aıasynda salǵan sýretteri kórsetilip, «Uly dala ádebi» kórmesi tanystyryldy.