Batys Qazaqstan oblysynyń Bókeı ordasy aýdanynda poıyz júk kóligine soǵylyp, bir adam qaza tapty, dep habarlaıdy Egemen.kz.
Oqıǵa 23 maýsym kúni 13:30 saǵat shamasynda bolǵan. Bókeı ordasy aýdanynyń ortalyǵy Saıqyn aýylynan 3 shaqyrymdaı jerde, temirjol ótkelinde «Shahman» júk kóligi poıyzǵa jol bermeı, júk poıyzynyń teplovozyna soǵylǵan.
«Jol apatynyń nátıjesinde alǵan jaraqaty saldarynan júk kóliginiń júrgizýshisi sol jerde qaza tapty. QR Qylmystyq Kodeksiniń 344 baby, 2 bóligi boıynsha tergeý amaldary bastaldy. Jol-kólik oqıǵasynyń sebep-saldary anyqtalyp jatyr» dep habarlady polısııa baspasóz qyzmeti.
Júk poıyzy quramynda 90-nan asa tirkeme bolsa, onyń basym bóliginde, ıaǵnı 74 sısternada suıytylǵan gaz bolǵan eken. Kólikke soǵylǵan teplovozdan órt shyǵyp, jana bastaǵan. Al poıyzdyń vagondaryn TJD kúshteri lokomotıvten jedel aǵytyp, temir joldyń qaýipsiz ýchaskesine alyp ketken. Tótenshelikterdiń kásibı sheberligi, jedel qımyly arqasynda lokomotıvtiń órti tez sóndirilip, qozǵalys qaýipsizdigi qamtamasyz etildi. Apat kezinde temirjol boıyna zııandy zat tógilmegen, tabıǵatqa zııan kelmegen.
Qolda bar aqparatqa qaraǵanda «Shahman» avtokóliginiń rólinde 1958 jyly týǵan E.T. esimdi azamat bolǵan eken. Ol oqıǵa ornynda tilge kelmeı qaıtys boldy. Júk kóligi «Suńqar» JShS-ine tıesili kórinedi. Al Astrahan oblysynyń Basqunshaq stansasyna bet alǵan teplovoz Reseı Federasııasynyń Prıvoljsk temirjol júıesine qaraıdy.
Aıta keteıik, Batys Qazaqstan oblysynyń Jánibek, Saıqyn jáne Shońaı temirjol beketterin Reseıdiń jolaýshylar jáne júk poıyzdary paıdalanyp, táýligine birneshe márte ótedi. Olar Qazaqstan aýmaǵyna aıaldamaıdy.
Batys Qazaqstan oblysy