Májilis depýtaty Ekaterına Smyshlıaeva QR Premer-Mınıstrine joldaǵan depýtattyq saýalynda jasandy ıntellekt (JI) salasyn damytýda quqyqtyq negizdiń jetkiliksizdigine nazar aýdardy, dep habarlaıdy Egemen.kz.
Onyń aıtýynsha, Memleket basshysy JI-di damytýdy ulttyq basymdyq retinde atap kórsetip keledi, biraq bul tek tehnologııalyq emes, keshendi qoǵamdyq daıyndyqty talap etetin úderis.
«Degenmen, jasandy ıntellekt jaı ǵana tehnologııa emes. Onyń damýy qoǵamnyń jan-jaqty daıyndyǵyn talap etedi. Halyqaralyq reıtıngter mundaı daıyndyqty negizgi quramdas bólikterge qaraı baǵalaıdy: sıfrlyq transformasııa deńgeıi, ınfraqurylymnyń qoljetimdiligi jáne normatıvtik bazanyń jetilgendigi», dedi Ekaterına Smyshlıaeva.
Depýtat JI týraly zań jobasynyń Májiliste birinshi oqylymda qabyldanǵanyn eske sala otyryp, bul tek keshendi jumystyń bastaýy ǵana ekenin jetkizdi.
Ol zańnamadaǵy negizgi kemshilikter men táýekelderdi tizbekteı kelip, naqty alty problemalyq baǵytty atap ótti:
JI damytý tujyrymdamasy qabyldanǵanymen, onyń memlekettik josparlaýǵa yqpaly az. Qylmystyq jáne ákimshilik zańnamada JI-men baılanysty quqyq buzýshylyqtardy tergeýge qajetti sıfrlyq dálelder men krımınalıstıka quraldary qarastyrylmaǵan. Bilim men densaýlyq saqtaý salalarynda JI qoldanýǵa qatysty etıkalyq normalar jetispeıdi. Jergilikti mamandardyń ornyna halyqaralyq korporasııalardyń keńesshileri tartylyp otyr, bul múdde qaıshylyǵyn týǵyzady. AI gıperregýlıasııasy qaýpi bar. Sonymen birge eksperımenttik quqyqtyq rejımderdiń áleýeti áli is júzinde paıdalanylmaǵan. Jergilikti kompanııalarǵa qoıylatyn talaptar transulttyq oıynshylarǵa áser etpeıdi, bul otandyq qaýipsizdik pen básekege qabilettilikke keri áser etedi. Jańa normalardy tıimdi iske asyrý úshin sıfrlyq quzyreti bar zańger mamandar jetispeıdi.Osyǵan baılanysty depýtat kelesideı usynystardy aıtty:
Salalardaǵy JI-ge daıyndyqty baǵalaý úshin sıfrlyq jetilý ındeksin engizý jáne regýlıatorlyq aýdıt júrgizý; JI damytý tujyrymdamasynyń mártebesin arttyryp, ony memlekettik josparlaý qujattarynda mindetti túrde eskerý; Halyqaralyq qaýipsizdik standarttaryna negizdelgen salalyq JI reglamentterin ázirlep, olardy salaaralyq saraptamalyq komıtetterde bekitý; Sıfrlyq krımınalıstıka quraldaryn damytý, JI arqyly jasalǵan quqyq buzýshylyqtarǵa áreket etý mehanızmderin engizý; Quqyqtyq «qumsalǵyshtardy» keńinen engizip, jańa tehnologııalardy qaýipsiz túrde synaý múmkindigin qamtamasyz etý; • Zańnamalyq aktilerdiń mashınoqurylymdyq bolýyn qamtamasyz etip, zańger kadrlardyń JI salasyndaǵy biliktiligin arttyrý.«Bizdiń fraksııa úkimetpen birge jasandy ıntellektti quqyqtyq retteýdi «tiri zań» formatynda, bıznes pen sarapshylardan keri baılanys ala otyryp, ári qaraı jalǵastyrýǵa daıyn», dep túıindedi sózin depýtat.
Smyshlıaeva bul usynystar JI-di qaýipsiz, ádil jáne tıimdi engizýge quqyqtyq negiz qalaý úshin asa mańyzdy ekenin atap ótti.