Onyń ishinde taýyq etin óndirý qunyn arzandatýǵa 15,2 mıllıard teńge bólingen. Bul týraly Aýyl sharýashylyǵy vıse-mınıstri Amanǵalı Berdalın málimdedi, dep habarlaıdy Egemen.kz.
Aýyl sharýashylyǵy vıse-mınıstri Amanǵalı Berdalınniń aıtýynsha, Qazaqstanda qus sharýashylyǵy salasynda asyl tuqymdy bazany damytý qajet.
«Búginde elimizde qus sharýashylyǵyndaǵy asyl tuqymdy reprodýktorlar negizinen óz qajettilikterin óteý úshin jumys isteıdi. Otandyq qus fabrıkalaryn tolyqtaı asyl tuqymdy materıalmen qamtamasyz etý maqsatynda memleket tarapynan «Qus sharýashylyǵyndaǵy birinshi jáne ekinshi deńgeıli asyl tuqymdy reprodýktorlardy qurý jáne keńeıtý» baǵyty boıynsha ınvestısııalyq sýbsıdııalar qarastyrylǵan. Osy qoldaý aıasynda biz jumsalatyn shyǵyndardyń shekti mólsherin qaıta qarap, olardy qazirgi naryq baǵasyna sáıkestendirdik», dedi A.Berdalın.
Sondaı-aq, qus sharýashylyǵyndaǵy asyl tuqymdy reprodýktorlardy qurý jáne keńeıtý boıynsha ınvestısııalyq shyǵyndardy óteý úlesi 25%-dan 40%-ǵa deıin ulǵaıtylǵan.
«Asyl tuqymdy reprodýktorlardyń qurylysyn yntalandyrý maqsatynda biz Soltústik Qazaqstan oblysynyń tájirıbesine súıene otyryp, jobalardy qarjylandyrý bóliginde kredıtteý erejelerine tıisti ózgerister engizdik. Baǵdarlamanyń basty sharty — 10 jylǵa jyldyq 2,5% mólsherlememen jeńildetilgen nesıeler berý. Bul sharalar osy baǵytqa ınvestısııa tartýǵa múmkindik beredi», dep atap ótti ol.
Vıse-mınıstrdiń aıtýynsha, memleket tarapynan et baǵytyndaǵy qus sharýashylyǵyn sýbsıdııalaý jalǵasyp jatyr.
«Bıyl bul maqsatqa 15,7 mlrd teńge bólindi. Onyń ishinde taýyq etin óndirý qunyn arzandatýǵa — 15,2 mlrd teńge, al ata-ana jáne baba formasyndaǵy táýliktik asyl tuqymdy balapandardy satyp alýǵa — 583,3 mln teńge baǵyttaldy. Al jumyrtqa baǵytyndaǵy qus sharýashylyǵynda asyl tuqymdy taýyqtardan alynǵan táýliktik balapandardy satyp alý qunyn arzandatýǵa shamamen 457,4 mln teńge bólindi», dedi vıse-mınıstr.