Májilis depýtaty Baqytjan Bazarbek birneshe óńirlerdegi jer salasynda bolǵan zań buzýshylyqtar týraly depýtattyq saýalyn Úkimet basshysyna joldady, dep habarlaıdy Egemen.kz.
B.Bazarbektiń aıtýynsha Jetisý oblysynyń Alakol aýdanynda bıyl 26 sáýirde áriptesi Murat Abenovpen «Jer amanaty» jer komıssııasymen is-sapary barysynda Aqshı aýylyndaǵy sý jaǵasyndaǵy kommersııalyq maqsattaǵy 500-ge jýyq berilgen jerlerdiń 2016 jyldan bastap ıgerilmeı, paıdalanylmaı jatqanyn kózben kórgen.
«Jergilikti aýdan ákimdigi, aýdannyń jer jáne sáýlet, qurylys bólimderi, oblystyq jer resýrstaryn basqarý Departamenti basshylary men qyzmetkerleri nege baıqamaǵan? «Jer amanaty» teksermeıinshe nege únsiz otyrǵan? Mine qazir qolymda joǵaryda ataǵan 500 jer ýchaskeleriniń 351 ýchaskesi boıynsha aqparat, jer ıeleriniń aty jóni men jeriniń kadastrlik nómirlerinen bastap, qurylys júrgizýge ruqsat bergen ýaqytyna deıin tolyǵymen jazylǵan. Qazir árbir famılııany tekserip, ákimdikke qandaı qatysy bar ony da tekserip Bas prokýratýraǵa jiberemiz», dedi depýtat.
Májilis depýtatynyń aıtýynsha, Sarqan aýdany boıynsha tipti túsiniksiz jaǵdaı bolyp otyr.
«Sarqan aýdany ákiminiń aqparaty negizinde jáne azamattardan túsken aryz ótinishteri boıynsha «Mart-Agro», «Sarqan MTS Agro», «Sarqan Agro» sııaqty iri aýyl sharýashylyq jerleri bar kásiporyndar ózderiniń jerlerin ıgermeı keledi degen ýájder túsip otyr. Keıbir atalǵan kásiporyndardyń artynda burynǵy Premer-mınıstr Tereshenkonyń jerleri de bar. Al, Jetisý oblysy boıynsha jer resýrstaryn basqarý Departamentiniń aqparaty boıynsha jer ıgerilip jatyr. Jer ınspektorlary zań buzylmady dep otyr. al Sarqan aýdany ákimi jáne biz kezdesken halyq jer ıgerilmeı keledi dep baıbalam salyp jatyr. Bul jaǵdaıdyń ózi Bas prokýratýra jáne ortalyq jer resýrstaryn basqarý komıteti tarapynan tekseris ótkizýdi qajet etip otyr», dedi Baqytjan Jumabekuly.
Depýtattyń aıtýynsha sonymen qosa, «Jer amanaty» jer komıssııasyna aýyl sharýashylyq kásiporyndarǵa sheteldikterdiń kelýi men onyń saldarynan, aýyl sharýashylyq maqsatyndaǵy jerlerdiń sheteldik azamattardyń ıeligine ótý qaýpi jóninde aryz ótinishter túsip jatyr.
«Naqtyraq aıtqanda, Aqmola oblysy Sandyqtaý aýdanynda 2004 jyly úleskerlerdiń jer úlesinen turatyn «SHP Polına» JShS-iniń 79,9% úlesin quryltaıshy «Dostyq-Sıntez» JShS-i Reseı Federasııasy azamatyna syıǵa berip, keıin sol shetel azamaty jarǵylyq kapıtaldaǵy qalǵan úlesin 2022-2023 jyldary aralyǵynda 30 úleskerlerden satyp alý satý shartymen ózine jalpy aýmaǵy 1000 gektar aýyl sharýashylyq jerdi rásimdep alǵan degen aqparatty qolymyzǵa tústi», degen depýtattyń aıtýynsha atalǵan úrdis Aqmola oblysynda ǵana emes, Soltústik Qazaqstan oblystarynda bolyp otyr.
Depýtat sonymen qatar Almaty oblysynyń Qarasaı, Talǵar, Ile aýdandarynda aýyl sharýashylyq maqsatyndaǵy jerlerdi jalǵan qujattarmen zańsyz bólý, segmentasııalaý órbip, baqylaýsyz ketip qalǵany týraly aıtty.
«Bas prokýratýradan: Alakol kóliniń jaǵasynda Jer resýrstaryn basqarý komıtetimen ıgerilmegen, paıdalanbaı jatqan 351 jer ýchaskesine tekserý sharalaryn ashýdy, paıdalanbaǵan jerlerdi memlekettik menshikke qaıtarýdy; Sarqan aýdanyndaǵy «Mart-Agro» JShS-niń ıgerilmeı, paıdalanbaı jatqan 17 myń gektar jeri boıynsha tekserý sharalaryn ashýdy, paıdalanbaǵan jerlerdi memlekettik menshikke qaıtarýdy; Almaty oblysyndaǵy jalǵan qujattar negizinde zańsyz segmentasııaǵa bólýge ushyraǵan aýyl sharýashylyq jerler alqaptar boıynsha tekserý sharalaryn ashýdy, sotqa deıin tergeý amaldaryn bastaýdy; Aqmola oblysyndaǵy «SHP Polına» JShS-ndegi aýyl sharýashylyq kásiporynnyń jer paıdalaný quqyǵynyń shetel azamattarynyń rásimdelý zańdylyǵyn tekserý jáne zań buzýshylyq anyqtalsa, jasalǵan mámilelerdi zańsyz dep tanýdy suraımyn», dedi depýtat.
Qazirgi ýaqytta Jer resýrstaryn basqarý departamentteri Tereshenkoǵa, Abyqaevqa jáne basqa da joǵary laýazymdy tulǵalarǵa tıesili jer telimderin tekserip jatqanyn aıtqan B.Bazarbekov depýtattyq saýalyn qorytyndylaı kele, taǵy birneshe jaıtty atap ótti.
«Almaty qalalyq sotynyń azamattyq ister jónindegi apellıasııalyq alqasynyń 2025 jylǵy 6 maýsymdaǵy qaýlysymen Almaty qalasynyń Mamandandyrylǵan aýdanaralyq ekonomıkalyq sotynyń Qarasaı aýdanynyń ákimi men 2004 jylǵy jekeshelendirý týraly kelisim (DKP) sheshimin zańsyz dep taný týraly sheshimi kúshinde qaldyryldy. Osylaısha, «Halyqaralyq klýbtar qaýymdastyǵy» JShS-ine tıesili, ıaǵnı general Novıkovtyń jerleri memleket menshigine qaıtaryldy!
Generaldy prokýratýradan zańdy kúshine engen sot aktisiniń oryndalýyn qamtamasyz etý aıasynda «Halyqaralyq klýbtar qaýymdastyǵy» JShS-iniń burynǵy 848 gektar jerine shekteý qoıýdy suraımyn.
Úkimetten atalǵan jer telimderin «Ile-Alataý memlekettik ulttyq tabıǵı parki» quramyna berip, tabıǵatty qorǵaý aımaǵy mártebesin berý máselesin sheshýdi ótinemin», dedi Baqytjan Bazarbek.